Manera ta conoci, Prins Bernhard Cultuurfonds Caribisch Gebied (PBCCG) ta un fondo cu ta cubri tur 6 isla den Caribe Hulandes, cu su oficina principal situa na Amsterdam y ta for di Hulanda PBCCG ta ricibi fondonan anual pa subsidia proyectonan riba e 6 islanan Hulandes. Prins Bernhard Cultuurfonds conoce diferente “Fondsen op Naam”, esaki ta fondonan cu meta pa cubri un parti specifico riba tereno cultural, scientifico of di cuido/proteccion di naturalesa. Aruba ta bay conoce awo su prome Fonds op Naam, esaki ta “Fonds Eduardo de Veer”.
Como cu Eduardo De Veer ta aprecia musica di piano hopi, a scoge pa piano y strijkinstrumenten.
Ainda nos ta corda e regalo na ocasion di celebracion di 18 di maart y apertura di Plaza Padu na aña 2017 den forma di un concierto di Raul Di Blasio!
E forma di sostene e desaroyo riba tereno musical ta di crea un asina yama PianoLab. E PianoLab ta situa den edificio “Rialto”, antes conoci como un di e cinemanan di famia De Veer.
Aki 8 studiante (y adulto) pareu por practica via un sistema nobo cu headphone. E forma cu lo opera e Pianolab aki ta en cooperacion cu e docentenan di piano y di viool. Hunto lo dileña e miho procedura pa esunnan cu mas mester y cu lo sa di haci maximo uzo di e oportunidad aki.
E meta principal ta pa brinda e hoben cu ta destaca den piano un oportunidad pa practica piano mas tanto sin tin gasto halto envolvi. Ta trahando duro pa cuminsa cu soft opening den vakantie grandi benidero den forma di un summer-piano-camp. E deseo ta pa den futuro cercano habri un Pianolab na San Nicolas tambe.
Mundo cultural ta aplaudi grandemente e iniciativa di Eduardo De Veer y ta spera cu mas Fondsen op Naam lo mira luz di dia na Aruba. Tin scarcedad di fondo pa desaroyo cultural riba diferente tereno y Prins Bernhard Cultuurfonds Caribisch Gebied ta activamente sondiando mas Fondsen op Naam riba e 6 islanan.
Pa mas informacion chek e website di PBCCG of mail [email protected].
