Awe mainta a drenta e noticia tristo cu e conocido Eddy Ras, tenista di fama internacional, “e mucha di Socotoro” a fayece. El a lucha largo cu u enfermedad y aunke el a gana varios bataya, awe mainta el a perde e guera. Eduard Anthony “Eddy Ras” a nace na Aruba dia 22 di januari 1950 y ta casa cu Oneida Ras Valdez. Nan tin 2 yiu, Natasha y Eduard. Den bida di Eddy Ras educacion tabata hopi importante, unda el a bay 3 aña di Mulo y John F. Kennedy School.
Ras ta un deportista hopi conoci y popular na Aruba. E ta un persona cu a practica varios deporte y a representa Aruba y Antias den casi tur deporte. For di chikito el a cuminsa haci deporte den barionan Socotoro y Companashi. Su mayornan, Elio Ras y Isabel Ras a motiv’e pa haci deporte, debi cu Eddy tabata sufri di asma. Eddy a hunga den little league y a milita den team di Oso Grape, bao guia di e conocido entrenado Chipen Chirino. Den Junior league, Eddy a hunga pa e team di Kodak bao guia di e legendario (d.f.m.) Luis Swaen.
Cu su 16 aña el a bay hunga p’e team di Marlboro y a hunga nuebe aña como shortstop y tercera base. Eddy a participa den diferente campeonato Antiano cu Marlboro. Tambe Eddy tabata den e seleccion di Senior League. Desde cu Ras tabata hoben el a hunga p’e team di futbol Aruba Junior y cu su 16 aña a hunga den hoofdklas. Despues Eddy a pasa pa hunga pa e team di RCA den cual el a hunga pa campeonato Antiano. Tambe Eddy tabata selecciona den futbol Hubenil y Senior. Den varios ocacion Eddy tabata den seleccion di Antias pa weganan di Reino na Hulanda y Surinam. No por lubida cu el a hunga p’e pre-cualificacion mundial, bao guia di e legendario (d.f.m.) Angel Bota, cu tabata coach di ekipo di RCA, B-class y a titula varios biaha como campeon di Aruba. Eddy tabata campeon di Junior y Senior pa varios aña.
Eddy Ras a sigui practica varios deporte mas entre otro: Ping- pong (campion B class), basket pa Aruba Junior y RCA, softball (Aldo), Judo, etcetera. El a opta pa keda den e deporte di tennis, pasobra el a gusta esaki mas. Eddy su entrenador di tennis tabata Armando Vieira di Brasil. Ta considera Eddy como un di e miho tenistanan di Aruba. Pa mas cu 15 aña largo, Eddy tabata campeon di Aruba di cual tres biaha el a gana campeonato Antiano. Ademas di campeonato local y Antiano, Eddy a participa na clasiconan di Marlboro, ALM, torneonan Centro Americano, Sur Americano y USA. Ras a yega di hunga contra e constelacion di hungadonan di fama mundial.
For di aña 1973 pa aña 1975 Eddy tabata coach di e seleccion hubenil di tennis. E seleccion aki a participa den varios encuentro internacional y a duna bon resulato, inclui den torneonan di J.I.T.I.C. Desde 1970 Eddy ta entrenador di tennis y el a traha 25 aña na Aruba Caribbean Hotel/Golden Tulip. Desde aña 1996 te cu 1998 Eddy tabata entrenador na Costa Linda Resort & Casino y desde 1998 Eddy a sigui como entrenador na su mesun club Eagle International Tennis Club Aruba. Mester menciona cu Eddie a habri caminda p’e muchanan di down sydrome por practica e deporte di tennis.
Dia 29 di maart 2010 Eddy a ricibi e condecoracion como Ridder in de Orde der Oranje Nassau pa tur loke el a haci pa deporte. Su conseho na e hubentud ta: Biba saludabel, keda leu for di droga, practica deporte cu hopi dedicacion y disciplina.
