Durante di e evento di gala Premio Excelencia den Deporte 2017 ta haci entrega di e maximo galardon na e atletanan cu a destaca den e aña deportivo cu a transcuri. Manera tur aña, Gobierno di Aruba pa medio di su Ministerio di Deporte ta premia e diferente categorianan di edad, esaki femenino y masculino. E aña aki un total di 9 categoria lo wordo premia, mientras lo duna reconocimento na e nobato femenino y masculino 2017 como tambe e scol basico y avansa cu miho resultado(nomina door di IBiSA)durante di e deporte escolar 2017 hunto cu nan MVP 2017 di scol basico y avansa.
Lo reconoce e miho atleta femenino y masculino di Special Olympics Aruba cu a destaca den e aña deportivo 2017 mescos tambe e miho atleta Paralimpico di 2017 escohi pa e organisacion di Aruba Paralympics Committee.
Mester corda cu Premio Excelencia den Deporte ta e unico evento deportivo unda nos miho deportistanan den tur edad ta bini hunto pa asina wordo reconoci pa nan prestacionnan deportivo. E ultimo dia pa entrega nominado di un of mas atleta lo ta diaranzon 21 di maart. Algun federacion deportivo ya a reacciona den forma postivo, mientras otronan tin cu manda nan nominadonan ainda te diaranzon atardi. Comision PED tin e speransa cu e federacionnan aki lo reacciona y nomina nan miho atletanan cu a destaca den e aña deportivo 2017.
Manera a wordo bisa anteriormente den Premio Excelencia den Deporte 2017 lo premia un total di 9 categoria esaki di infantil, hubenil, nobato, atleta di aña local y internacional como tambe e MVP y scolnan di aña.
Siguientemente e categorianan cu lo wordo premia den Premio Excelencia 2017
1. Deportista infantil/hubenil femenino te cu 13 aña
2. Deportista infantil/hubenil masculino te cu 13 aña
3. Deportista hubenil femenino di 14 te cu 18 aña
4. Deportista hubenil masculino di 14 te cu 18 aña
5. Nobato femenino di aña 2017
6. Nobato masculino di aña 2017
7. Scol cu miho resultado durante 2017 (nomina door di IBiSA)*
8. Atleta di Aña (destaca local) (minimo 18 aña) ***
9. Atleta di Aña (destaca internacional) (minimo 18 aña)
