Ta manera algo cu a bin na moda, di kibra drenta den auto pa wak kico tur tin, sin tene cuenta e gasto inmenso cu ta wordo laga atras pa e doñonan.
Ayera mes tabata tin un caso caminda a kibra bentana di un van para den parkinglot na Playa y e dia anterior, dos auto, para banda di otro, a sufri e mesun cos.
Ayera, e biaha aki esaki a sosode na Club Caiquetio, caminda cu 4 auto a core e mesun suerte cu esunnan na Playa. E doñonan di auto, a bay hunga nan Bingo, cu ta tuma luga tur diabierna, cu e confiansa cu nan ta bin yega haya nan propiedad intacto pa despues bay nan cas.
Antisocialnan ta kibra bentana y den algun di e autonan nan ta bay cu cos, pero den algun otro, nada no ta wordo horta. Ta trata aki di tres auto di marca Toyota y un marca Nissan.
Esaki sigur tin atencion di polis y di prensa, kendenan ta denuncia tipo di actonan asina. Ta parce cu caminda hendenan ta congrega, antisocialnan ta bin comete nan fechoria. Den e dianan aki tin hopi actividad y diabel ta los, nan ta busca cos di horta of causa daño. Nos mester ta hopi alerta pa esaki.
