Dialuna pa mas o menos 1:10pm a bati alarma den e bario di San Miguel na Noord pa un tiro cu a resona net ora cu bisiñanan tabata comiendo. Varios patruya di Polis a yega den e area y a para na e adres San Miguel # 31. E prome informacion tabata cu un homber a yega eynan pa agredi e doño di cas y den e proceso a los un tiro cu un arma di candela.
Sinembargo, ora cu e prome patruya di Polis a yega na e sitio, a topa cu e habitante cu a bisa cu ta e bisiña tabata matando un boa y a haci hopi desordo, pero cu no tabatin nada particular.
Asina mes, Polisnan atento a dal un buelta den cura y pa nan sorpresa a bin topa cu un “huls”, esta e restonan di un bala cayente benta patras den e cura di cas. Esaki obviamente ta un prueba palpabel cu tabatin un tiro!
Tur cos ta mustra cu esaki no ta un cas, sino un compleho di apartament, di cual ta huur camber. Pafo Polisnan a topa cu no menos di 6 diferente meter di coriente. Via un bentana, un homber a bula y sali na careda. No ta conoci si ta esun cu a tira of dor di a mira presencia di Polis a sali na careda.
Hopi Polis bisti cu “bulletproof vest” a yega den e area buscando e persona cu a tira. A rondona e cas, pero sin mucho resultado. Cuerpo Tecnico di Polis a presenta na e sitio, a cera e area unda a haya e huls di un pistool pa conduci e investigacionnan forensico necesario. A confisca e huls y a bay na e bentana unda e persona a sali na careda pa tuma “fingerprint”.
Remarcabel ta cu e ultimo siman aki, ta varios caso a tuma luga den cual a haci uzo di arma di candela, demostrando un crecemento bisto den posibel crimennan mas pisa den cual e sospechonan ta recori na uzo di arma pisa den nan fechorianan.Segun Polis, e huls tuma den beslag ta mustra di ta di un pistool caliber 38.
