Diabierna ultimo Campeonato HEINEKEN 2018 di Aruba Softball Bond dedica na dos baluarte Wiwi Maduro y Chin Thiel a inicia den tur tres categoria.
Despues di un bunita defile y ceremonia unda e baluartenan a ricibi nan reconocemento y a wordo homenahea, a tira lot pa prome wega. Den categoria AA masculino lo melita un total di 6 ekipo kendenan lo bataya pa e titulo maximo di aña 2018. E ekipo campeon di 2017 den categoria masculino AA, Royal Power a midi forsa contra Piratas.
E prome cuater inning e wega a keda hopi cera cu Royal Power comandando e partido cu e score minimo di 2-1. Tabata den di 5 inning cu Royal Power poco poco a haya su ritmo y a cuminsa “drive” e bala solido contra William Benitez e pitcher habrido di Piratas.
Di otro banda Jair Thomspon di Royal Power a inicia bastante descontrola pero mas laat den e wega e ta “settle down” y tabata tin dominio di e wega. Royal Power 10 careda, 11 hit, 0 eror y ta laga 9 coredor den circulacion. Piratas 1 careda, 2 hit, 2 eror y ta laga 6 coredo na base.
Como ekipo Royal Power a bati di 26-11 bon pa averahe di 423. Piratas a bati como ekipo 15-2 bon pa averahe di 133. Jair Thompson ta resulta pitcher ganador lansando un total di 95 lansamento di cual 47 bola y 48 strike propinando 9 ponche pa un ERA di 1.80.
Di otro banda William Benitez ta lansa 99 lansamento pa Piratas, 46 bola, 53 strike, 0 ponche pa un ERA di 16.20. Miho bateadornan pa Royal Power a resulta Gregory “Pilin” Krosendijk y Franco Wouters di 1-1, Kenny Hart 2-2, Jomark Flanegin di 4-2, Eldrick Dijkhoff y Jair Thompson di 4-1, Kelvin Silvania y Guyon Cannister di 3-1. Pa Piratas a destaca na plato Franny D’Oleo kende a bay di 2-2 y pues a conecta e unico dos imparabelnan pa su ekipo.
Dialuna awor campeonato lo continua riba veldnan na Pos Chikito momento cu pa 7:15 di anochi riba veld 2 Celebrities lo enfrenta Predators den A-Klas. Pa 7:15 di anochi riba veld 1 den A-Klas Black Hawks lo topa Black Yoker y pa 9’or di anochi Spuiters lo midi forsa contra Balashi Premuim den AA. Fanaticada softball competitivo fast pitch a la carga!!!
