Diadomingo pa mas o menos 2:15pm, recherchenan di e Unidad di Crimen Organisa a drenta un cas situa na Cadushi Largo # 16 di famia Kock-De Mey. E recherchenan a conta cu sosten di e ekipo di “Mobiele Eenheid” tur rond di e cas. A busca Hues Comisario mr. Yarzagaray pa presenta y controla si tur cos a bay bon durante e “huiszoeking”.
Esaki no ta prome biaha cu Polis ta bishita e cas aki, den cual ta biba ruman di dos Polis di rango hopi halto. E mama di e 4 yiunan tin 2 ruman Polis, pero e tin problema cu e yiunan. E tata a fayece algun tempo atras.
Na yegada di e Polisnan, a bati na porta di e cas, nan a notifica e famia cu nan tin permiso pa drenta y revisa e propiedad. Polisnan di Mobiele Eenheid a rondona e cas, sperando yegada di Hues Comisario mr. Yarzagaray.
A controla e cas, a controla e cunuca patras unda ta planta mata y den banda tin un garashi of un cuarto di palo, cu tambe a bira parti di e investigacion.
A manda busca cachonan entrena di K-9 pa yuda den e accion aki y e cacho a duna bon resultado tambe! A descubri plantacion profesional di mara di Marihuana mientras cu paden a topa cu mas artefacto.
Depues di sigur un 2 ora di investigacion intensivo, Polisnan a sali afo cu saconan preto di sushi yena cu droga. Tambe a sali afor cu dos hemchi cu contenido.
Nos a compronde na e sitio cu a topa cu no menos di 98 mata di marihuana y otro droga, pero cu no tabata “mucho”. Den e mesun investigacion aki, e Polisnan di e Unidad di Crimen Organisa a bay mas cas pa haci “huiszoeking”. Ta sospecha cu esaki ta un grupo organisa cu ta atende den baho mundo.
Den e cuarto pafo, separa di droga, a topa varios brommer scondi, sea henter of piesa di brommer. A manda yama Recherchenan cu ta traha riba casonan di “Joyriding” pa tuma nota di e hayazgo aki.
Na final, Polisnan no a detene ningun persona na Cadushi Largo. Si a menciona cu e investigacion penal lo continua awo.
