“Goberna ta tuma decision, pa con duro esaki por ta”, asina Minister mr. Andin Bikker a anuncia awe diadomingo mainta den un conferencia di prensa yama cu caracter di urgencia. Esaki despues cu a spiert’e cu dialuna lo sali e noticia cu el a laga un otro pedofil den libertad prome cu ora. El a bin cu Procurador General intrerino, mr. Frans van Deutekom pa splica e punto di bista di Ministerio Publico riba e asunto. E biaha aki no a culpa KIA, sino Ministerio Pubico cu lo a cambia nan maneho sin inform’e, loke a haci cu el a firma e peticion den tur confiansa, sin sa cu e ta cometiendo un otro eror den wowo di pueblo.
Minister Andin Bikker a duna di conoce cu e ta masha rabia cu esaki pasobra Ministerio Publico a cambia e maneho di ex Minister Dowers di aña 2014, sin cu a informe. Consecuentemente el a firma den tur confiansa, sin cu e tabata consciente cu e preso cu ta pidiendo pa laga bay ta un pedofil. Cualkier persona lo pensa, despues di e susedido di algun dia pasa, cu e mandatario lo ta hopi mas skerpi riba e peticionnan aki. Sinembargo, el a bisa awe cu hopi biaha e peticion ta drenta diahuebs 4:55pm, pa e firma prome cu nan laga e preso liber su mayan mainta 8:00am. Bou e presion ey e ta firma constantemente y despues e mester carga e consecuencia politico.
E CASO:
A acusa e cuidado di preso Marco Solognier cu entre 30 Augustus 2008 te cu 29 September 2015 e tabata haci actonan inmoral y hasta tene relacion sexual cu su yiu muhe menor di edad. Dia 29 di januari 2016 Hues a conden’e na 5 aña di prison, confirmando e exigencia di Fiscal. Durante tratamento di e caso Hues a puntra Solognier, ta con e por a haci algo asina. El a ocntesta cu e tabata haya emocion cu e no por a controla. El a bisa Hues cu despues di algun aña el a bisa su yiu cu e sa cu el a haci malo y pa stop pero despues el a bolbe cuminsa cu su yiu y cos a bay mas leu te cu el a tene relacion sexual cun’e.
SENTENCIA:
Hues a bisa di a haya legalmente proba cu Solognier ta culpabel di a abusa di su yiu muher menos cu 15 aña. Hues a tene cuenta cu tempo e mucha tabatin 8 aña, e tata a abusa di e mucha te cu ora e mucha tabatin 15 aña, el a tene relacion sexual cune. Na opinion di Hues, Solognier a abusa di su posicion di tata y tabata bisa e mucha pa keda keto. E ta haya cu Solognier a tacha e integridad di e mucha y a afecta su desaroyo sexual. Ta ora cu e mama no tabata na cas, e tabata haci esaki. Hues a mustra cu muchanan cu bira victima di abuso na edad jong, por sufri problema psygico.
LIBER CABA:
Sintando un castigo desde aña 2016 pa 5 aña largo, si kita un tercera parti, e pedofil aki lo mester a sali te otro aña di prizon, pero a opta pa lage bay adelanta. Esaki ta precisamente locual comunidad di Aruba ta condena y por a nota cu hasta Consehero di Minister di Asuntonan Social a condena e decision di Minister Bikker, bisando cu nos ta den un Crisis Social y Minister ta laga pedofilnan sali liber prome cu ora.
Maneho nobo di Andin Bikker:
Minister mr. Andin Bikker a anuncia cu awor si e no ta permiti mas fout tuma luga y cu el a instrui e departamentonan concerni pa bin cu un cambio den ley unda ta saca e opcion pa pedofilnan por sali liber prome cu ora. E mandatario sinembargo a subraya cu e problema mes ta cu KIA ta mucho yen y no tin espacio pa cera mas preso. Pues cada biaha cu detene hende nobo, mester laga preso actual bay. Du otro banda, comunidad mester compronde tambe cu e presonan aki lo sali un dia, pues sea ta awo of despues di dos luna, nan lo mester reingresa den comunidad bek.
