Hopi hende cu conoce Minister mr. Andin Bikker bon no ta ni reconoce mas. Ta increibel lesa loke el a publica riba su cuenta di red social awe. Ta imagina cu no ta e mes a skirbi esey, sino e compania cu e ta paga pa “cuida” su imagen pe. Lamentablemente el a gaña publicamente den e caso di metemento den trabou di Warda nos Costa ayera, pa yuda e sponsor principal di partido POR!
Si Minister Andin Bikker no sa, nos mes tin cu informe cu di e 7 trahadonan indocumenta cu Warda nos Costa a hiba for di Fast Delivery, a resulta cu no menos di 5 tabata ilegal! Di unda e Minister ta haya ta bon pa sali bisa cu no tabatin ilegal na trabou ta un asunto hopi serio!
Es mas, nos fuentenan na Warda nos Costa a confirma cu awe mainta Fast Delivery mes a hib pasashi pa deporta e prome 3 ilegalnan, cu mester sali pa Venezuela y Colombia. Ta keda dos mas cu lo mester bandona nos isla den e siguiente oranan.
Pa loke ta metemento di e Minister y cuestionamento di e forma di traha na Warda nos Costa, nos ta ret’e publicamente! E poco integridad cu e Minister aki a resta despues di comete tanto eror den su funcion tan anhela di Minister di Husticia, no ta yuda, awo cu e kier tribi di desmenti di a yama Hefe di Warda nos Costa, Trudy Hassell, pa cuestiona dicon a bay Fast Delivery. Cu awor kier bisa cu tabata un combersacion ameno ta un hilaridad….Minister no mag mete mes cu funcionamento di un departamento asina! Sea nos ta combati ilegalidad of no, nos no por combati’e cu hende di AVP y MEP so pero sin mishi cu sostenedonan di POR.
