Theo de Kool, director financiero di hospital, a splica cu ta bezig pa regla algun asunto. Por ta nan no ta completamente cla pa turismo medico pa ricibi hende for di rond mundo pa cierto tratamentonan, pero si mester pensa riba e region.
E ultimo tempo a wordo publica cu a cera un acuerdo cu e hospitalnan riba e otro islanan di ex Antias, entre nan Corsou, St. Maarten y Boneiro. Si tin idea riba algun forma di cuido, unda cu por yena un funcion den e region. Riba e mesun manera Corsou y Boneiro por bay yena cierto funcion den e region. Akinan na April, a habri e facilidad di intervencion den Cadriodologia. Esey ta algo tipico caminda cu por brinda servicio na pashentnan di Boneiro y Corsou.
Den e forma eynan, hospital por tin un funcion pa brinda servicio na pashentnan pafo di Aruba. Tipo di turismo medico ta posibel.
Loke si ta fastioso pa e proximo añanan te ora cu keda completamente cla, ta e capacidad limita di cama. Mientras cu ta bezig cu e renobacion no por uza e hospital completamente. Mester scoge prome pa e pashent local. No por tuma mucho pashent di exterior, mirando cu e costo ta bay na prome instante pa e pashent local. Den e forma aki, e prome añan pa tuma pashentnan di exterior, el a menciona.
Specialidadnan
Na prome instancia, hospital ta uno general. Mester por brinda tur clase di cuido y algun aspecto special. Turismo medico ta algo cu ta draai rond riba cierto cosnan cu ta specialisa. Debi cu na prome instancia ta un hospital general, mester scoge cuidadosamente den kico por specialisa. Ta pesey a dialoga cu hospital na Corsou y Boneiro, unda tin cu palabra den kico esun di Aruba ta specialisa y kico e otro dos hospitalnan aki ta specialisa. No ta asina cu den tur forma di cuido, por bay ofrece turismo medico. Mester tin algo cu ta hopi bon den dje. Pone un liña bon cla riba e cuido cu por wordo haya riba e isla. Cu entre otro interventie cardiologi, a haya un niche cu por haci esaki hopi bon, de Kool a splica por ultimo.
