Tin un decision di Hues pa hopi tempo caba, cu ainda Gobiernonan no kier cumpli cun’e. Pero e pasenshi di Digicel a cuminsa caba. Cada bes nan ta pone un tiki mas presion, pa asina Gobierno cumpli cu e sentencia aki y nan tin un motibo pakico nan kier haci esaki. Ta parce cu mescos a sosode 16 aña pasa, cu atrobe e compania di comunicacion lo mester bay Hues pa busca su derecho. E kier competi cu Setar basa riba condicionnan husto y no cu Gobierno ta proteha e compania nacional cu un monopolio riba servicio di internet. Digicel ta convenci cu habrimento di mercado, mescos cu a sosode na aña 2003, lo percura pa mas servicio, miho tarifanan y engrandecemento di e mercado di comunicacion general.
mr. Dello Gomes, Presidente di Digicel, a comenta cu desde aña 2017 tin dos sentencia, unda cu Gobierno den e caso aki, e Minister anterior, mr. drs. Richard Arends, a wordo ordena pa tuma un decision riba e aplicacion pa pidi pa haya un permiso pa pone fiber riba tera y tambe trece un kabel submarino pa Aruba, pero esey no a tuma luga. E tempo a pasa y Digicel a haya su mes ta bay Corte un biaha mas y bolbe mustra cu e Minister no ta cumpliendo cu e decision. E biaha aki na augustus Hues a ordena e Minister un biaha mas, e biaha aki Chris Romero, pa den tres luna tuma un decision, pero e biaha aki a pone un dwangsom riba dje. Esey ta un extra prikkel pa asina ey e Minister haci su trabao, tuma un decision riba e dos peticionnan. Prome cu esey, sin esey aparentemente, no tabata suficiente. No a respeta e prome decision di corte.
Dwangsom
Mester tuma un decision dentro di tres luna, pa ta specifico dia 7 di November, 2019. Pero si no cumpli cu e decision, tin un dwangsom di 10 mil florin cu ta core pa dia, te cu un maximo di 900 mil florin.
Miedo di gobierno
A entrega e aplicacionnan for di aña 2016. Un pakete basta diki y amplio, cu a wordo traha cu tur experto den cas riba e tereno di fiber. Tin di remarca cu desde e dianan ey ningun dia so, ni DTZ, ni e Ministernan Mike de Meza, Richard Arends ni Chris Romro no a haci ningun pregunta of remarca riba e contenido di esey. Awor aki mester a hasta bay Corte pa haya atencion riba esaki, segun Gomez.
No sa pakico e ta dura asina hopi. Minister recientemente a declara cu e mester a bin cu un maneho. Ta aplaudi cu kier bin cu un maneho riba e parti di kabel submarino. Sinembargo pa loke ta fiber di tera y e fiber submarino, ta algo cu ta wordo uza caba y pesey no tabata tin mester ni ley nobo, ni maneho nobo, etc. E ora ta bisa, como un otro operador den e sector aki, nan tambe tin derecho di haya e mesun trato. A base, si bay bek den añanan 2002, a end up den corte, pa asina, atrabes di corte, por a yega na e mercado y duna e consumidor mas escogencia riba e tereno di telefon mobil.
Silencio
Gobierno ni Minister Chris Romero no a tuma un posicion di proteccion. Nan no a ni bisa ni si, ni no, ni cualkier otro motivacion pa loke ta e silencio. Durante cu e maneho nobo a bin, traha door di un experto Hulandes cu wordo treci Aruba door di Minister Romero, pa haci un investigacion. El a sinta cu Digicel. Pero esey tabata e unico contacto cu tabata tin cu por a discuti nan aplicacion y nan plannan. Despues di esey, personalmente Gomez a sinta cu e conseheronan di e minister pa splica. Tabata tin comprension tambe cu nan no tin nada den oficina, ni ningun aplicacion, ni file. E ora a bay bek, a hiba tur cos bek, aunke cu DTZ, for di prome dia tabata tin tur cos.
A bay di nobo y splica tur cos. Si mira e hurisprudencia, e hecho cu a base di articulo 10 di e tratado Europeo, mescos cu den pasado, tin derecho di riba e concentracion, mirando cu gobierno tabata trahando riba un proyecto di innovacion cu ta importante, e ora ta bisa cu na momento cu trece e dos fibernan aki, ta un desaroyo enorme riba tereno di innovacion.
Pasobra e ora ta yuda crea e infrastructura necesario pa e innovacion aki tuma luga. Pa loke ta e falta di tuma decision, no obstante tin un total di cuater sentencia di hues. Dos awor aki y na 2017, Gomez no ta sigur si ta cuadra cu e programa di integridad tambe cu ta wordo cumpli cun’e.
Den nos estado di derecho, si hues tuma un decision, bo tin pa respet’e. No ta bisa cu no ta respet’e y ta warda te cu bay bek pa bin cu un dwangsom, e ora si ta haci esey.
E proceso
E fiber sigur riba tera y den lama, ta un proceso. Tin e plannan traha. Pero di otro banda, cu tur e tardansa cu a pasa den tur e tempo aki. Na momento cu nan tin siguransa cu nan por traha, e ora ta activa e plannan ey di nobo, haci e updatenan necesario, haci e inversionnan necesario y cuminsa mobilisa pa trabaonan cuminsa.
E no lo pasa di un dia pa otro. Obviamente si gobierno tuma un decision awe, no ta asina cu pa otro siman of pa fin di aña por ta cla y ta den operacion. Lo mester bestel e ekipo y treci na Aruba. Tin cu contrata hendenan acerca. Tin pensa di redobla e cantidad di personal cu tin awor aki, na momento cu esey pasa. Mester capacita e hendenan aki, tanto esunnan existente, como esunnan nobo, pa traha cu e tecnologia cu awe no ta wordo uza. Esey tambe ta bay duna trabao tiki mas tecnico y specialisa y pa trabaonan den futuro.
