Den su prome bishita na Hulanda desde cu el a bira Prome Minister, mr. Evelyn Wever-Croes a reuni cu Prome Minister di Hulanda, Mark Rutte. A discuti varios tema, entre otro e tema financiero di nos pais. Hulanda no tin mucho confiansa den finansa di Aruba debi cu Gobierno anterior a viola tur palabracionnan cu Hulanda, segun un comunicado di Gobierno di Aruba.
Prome Minister cu su bishita lo percura pa reestablece e confiansa aki, segun Gobierno di Aruba a indica awe mainta. Mark Rutte, naci dia 14 di februari 1967 ta e di 50 Minister Presidente di Hulanda desde aña 2010z e ta lider di “Volkspartij voor Vrijheid en Democratie” (VVD) desde aña 2006. Den pasado el a yega di ocupa e puesto di Secretario di Estado pa Asuntonan Social y Labor, tambe di Enseñansa, Cultura y Ciencia.
Evelyna Christina “Evelyn” Wever-Croes ta naci na Aruba dia 5 di december 1966 y actualmente ta Minister Presidente di Aruba. El a asumi e posicion dia 17 di november 2017, encabesando e coalicion di MEP (9), POR (2) y RED (1). E ta e prome hende muhe pa asumi e funcion di Minister Presidente di nos pais. E ta lider di Partido MEP desde aña 2011. E ta e prome hende muhe pa encabesa e partido politico tambe, actualmente e di dos partido mas grandi na Aruba (22.061 voto) despues di partido AVP (23.376 voto).
