Cada aña ta celebra “World Wetlands Day” riba 2 di februari, e tema di e aña aki ta: “Wetlands
for a sustainable Urban Future”. En conexion cu e dia aki, Ministerio encarga cu Infrastructura y
Medio Ambiente ta haye sumamente importante pa trece luz riba e importancia di e dia aki. Tur
aña riba e fecha aki ta conmemora firmamento di tratado di Ramsar na e ciudad Iranes Ramsar
den aña 1971. Den cuadro di esaki tur aña ta scohe un tema di enfoke. E aña aki e tema di
conscientisacion tin un enfoke fuerte riba e balor di Wetlands den area hopi pobla/urbano.
Kico ta Wetland?
Un Wetland ta un area/tereno cu ta satura cu awa, sea permamente of durante cierto temporada of ta
inunda frecuentemente.
Un di e puntonan cardinal ta cu den e area urbano, un Wetland/ Saliña no ta ‘waste land’ pero un area
extremadamente valioso pa nos medio ambiente pa diferente motibo: Reducion di inundacion den e
areanan aki (por ehempel: corda situacionnan di inundacion den pasado den area di Palm Beach Noord).
Tambe biodiversidad y area na unda hopi especie di Aruba pero tambe pafo di Aruba ta bishita y biba y
flora y fauna) Wetlands ta promove bienestar di e ciudadano y ta mehora calidad di aire den area cu un
densidad di poblacion halto. E combinacion di nos rooi nan, tankinan, saliñanan, Bubali Plas y Spaans
Lagoen ta forma base di e infrastructura ‘muha’ di Aruba. Awa no ta yobe tur ora na Aruba, sinembargo
ora cu awa yobe e ta basha hopi den un tempo relativamente corto, cual sa causa inundacionnan. Den e
caso aki e funcion di e areanan menciona ta pa gara y maneha e capasidad di awa. Tin diferente tipo di
saliña na diferente sitio y como tambe den area mas popula manera area di hotel.
Mundialmente paisnan cu ta wordo considera rico y cu ta den adelanto, ta paisnan cu banda di e
importancia di e aspecto economico, ta enfoca tambe riba biodiversidad di e medio ambiente. Realidad ta
cu e crecemento di poblacion, urbanisacion y necesidad di espacio, careteranan entre otro, ta pone hopi
presion riba e infrastructura acuatico rond mundo y na Aruba tambe. Considerando e reto aki, ta
importante pa crea conscientisacion tocante e balor di e areanan aki.
