Diasabra atardi director di WEB, Alfredo Koolman tabata den un conferencia di prensa p’asina splica kico a bay robes cu e prome blackout di aña 2023. E director tabata hopi breve den su splicacion y contestacion. Apart di esey, a puntra e director si tin un hende cu lo para responsabel, sea un hende lo perde trabou of no. El a sigura, cu WEB tin su procedura di ‘hoor en wederhoor’ den casonan asina y si ta necesario lo tuma e pasonan necesario.
Segun WEB: Ta hopi probabel cu e black out di diabierna27 di januari ultimo ta ocasiona pa un storing den e sistema electrico cu ta proteha e transformadonan di e motornan di planta RECIP IV. Esaki a resulta for di un investigacion hopi preliminar haci pa WEB Aruba. E blackout a surgi alrededor di 11:00 am. A dura mas o menos 3 ora y mey prome cu a recupera suministro di coriente completamente pa e isla.
Tanto WEB Aruba como ELMAR a mantene comunidad na altura di progreso di e recuperacion via medionan social. Un investigacion mas profundo lo mester duna mas claridad tocante causa di e blackout. Aunke e produccion actual ta stabiel, lo tin extra wowo riba e produccion.
Actualmente ta haciendo testnan como parti di e procedura pa keda optimalisa planta RECIP IV. Segun proceduranan fiho, ta haci e testnan riba e sistema di voltahe halto cu ta proteha e sistema electrico di planta RECIP IV. A surgi un storing den e sistema di proteccion di transformado riba cual dos motor RECIP IV tawata conecta. E motornan na e momento cu e storing a surgi, tawata den funcion y a perde un montante substancial di coriente, cual finalmente a conduci na un blackout.
WEB ta hopi consciente di e impacto cu interupcion di coriente tin riba bienestar di comunidad y economia di Aruba. P’esey e compania di awa y energia ta ofrece su disculpa y ta gradici pa e comprension.
