Diamars ultimo a tuma luga apertura inoficial di Watty Vos Boulevard. Esey ta un ader nobo cu ta start for di e spiraal rotonde dilanti di aeropuerto y ta pasa den Sabana Blanco, Cumana, pasa den San Barbola, sigui den Sero Patrishi, Tanki Leendert, Ponton, Hato, Bushiri y ta caba te cu e rotonde banda di e edificio di Guardian Group. Awo tin hopi mucha jong ta puntra nan mes ken ta Watty Vos. Sobrino di Watty Vos dfm, Eduard “Edu” Vos, ta conta e storia tras di e avenida, cu despues a haya e nomber di boulevard.

Ringweg 3

E storia di Ringweg 3 a cuminsa 43 aña pasa. Na 1976, Watty Vos tabata diputado di obranan publico formando parti di MEP como un di su fundadonan, e tempo ey caba a cuminsa papia y visualisa e caminda aki cu e tempo ey a haya nomber di Ringweg 3, mirando cu den pasado hopi aña atras tabata tin Ringweg 1, cu ta John G. Emanstraat. Tambe tin Ringweg 2 cu tabata Weststraat. For di eynan e nomber Ringweg 3 a bin.

Watty Vos Boulevard…un soño di 1976

Watty Vos Boulevard…un soño di 1976

Posted by 24ora on Tuesday, November 5, 2019

Despues di esey, Watty Vos a kibra cu MEP. A lanta partido Ruba. Despues Ringweg 3 a manera bay den lachi. Na DOW si a keda traha riba dje y te despues di Status Aparte den e periodo di 1986 pa 1989, tempo cu gabinete Henny Eman I y Watty Vos tabata e prome minister di Husticia den un coalicion y despues a bin kiebro den coalicion, a bolbe pickup Ringweg 3. E tempo ey a cuminsa cu compra di tereno y di cas riba e ruta aki. Tabatin como 80 pa 90 tereno of cas.

Na februari 1989, despues di eleccion AVP a bay den oposicion. Un otro signatura a sinta y e proyecto a bolbe vriez. Na september 1994, mesora a pickup cu e proyecto aki. E tempo ey Watty Vos tabata Minister di husticia y obranan publico. E taskforce grandi di infra, tabata envolvi DOW, e tempo ey Jossy Figaroa y su ekipo. Un di e miembronan envolvi ta Marlon Croes, kende ta director actual di e departamento. Di parti di Kadaster tabata Leo de Cuba. Tambe Vi Franken. Na Domeinbeheer tabata Franklin Abath y Roland Tromp y na VROM tabata tin e ekipo bao di Elton Lioe A Tjam. Ta algun tereno so no a logra cumpra. E tempo ey a cuminsa pinta e caretera. E team bao di Marlon Croes, esta DOW a tuma encargo y cu conseho di VROM, Domeinbeheer, Kadaster. Tur ta ingeniero, sinembargo cada ken tabatin su tarea. E concepto a sali na cla e tempo ey. 

Na januari 2001, Watty Vos a fayece. Un luna despues a lanta e fundacion na memoria di Edgar Joaquin “Watty” Vos, esta Fundacion Watty Vos. Como directiva a cuminsa brainstorm con pa mantene e memoria di Watty Vos na bida.

Un di nan tabata scol di polis. Despues di hopi contratiempo y lucha, Watty Vos a percura pa e scol y e caminda. A bin cay cu Ringweg 3, cual Watty Vos a bin cun’e y visualis’e. Ki ora cu e sinta den gobernacion, ta saca e proyecto aki for di lachi.

Dia 16 di augustus 2001, durante un santo sacrificio di Misa, durante Dia di Polis, a entrega e peticion oficialmente na e Prome Minister di e tempo ey, Henny Eman. El a pase pa e comision pa traha riba e proyecto aki. E peticion tabata pa nombra e Avenida Edgar Joaquin “Watty” Vos.

A cumpra e borchi di caya, skirbi Avenida Edgar Joaquin “Watty” Vos, politico di Aruba y a haci un peticion na gobierno via DOW, si dia 6 di januari 2002, si por bin recorda cu e caminda aki den futuro ta e caminda cu lo nombra na nomber di Watty Vos. A haya cooperacion di DOW, pero solamente mester pidi aprobacion di gobierno. E tempo ey lamentablemente e Minister di infrastructura a bisa no, pa motibo cu no ta etico pa honra un politico of un persona riba su fecha di fayecimento y mirando tambe cu e caminda no ta completamente cla. Mester a warda te ora cu e ta completamente cla. 

Asina mes a haci algo cu e fecha ey. Augustus e mesun aña, a haya cooperacion di ex Prome Minister Nel Oduber y ex Minister Rudy Croes pa a devela e nomber di Watty Vos na Scol di Polis.

Eduard “Edu” Vos, diamars ultimo den entrevista cu Patrick Paskel riba pleno Watty Vos Boulevard, cerca di e rotonde na Cumana. El a admiti di a haya “kippenvel” e mainta ey ora el a core riba e boulevard pa prome biaha.

Casonan den Corte

Como griffier, Edu Vos a cay na cuenta, cu abogado David Kock, tabata representa mayoria di e doñonan di e terenonan cu tabata falta pa cumpra, tabatin caso contra gobierno pasobra nan no kier a bende e tempo ey. Na 2010, partidonan a yega na otro, esta a haya greenlight pa cuminsa cu e proyecto.

Gabinete Mike Eman I a gana den forma abrumador na 2009 y pa medio di Benny Sevinger, a saca e proyecto y e concepttekening cu tabatin, a modernisa esaki. E bottleneck cu tabatin semper, e parti di finansas, e tempo ey hopi hende no kier a financia e proyecto. Nan a haya cu pa e suma pidi, e proyecto no tabata rendabel. 

E tempo ey Watty Vos Boulevard, a bira proyecto Watty Vos, cual ta e caminda di Sabana Blanco pa e rotonde di Cumana. E caminda di rotonde di Ponton bay te na misa Santa Anna y Sasakiweg, cu ta bay di e rotonde Sun Plaza bay te Superfood, cual awendia ta Avenida Nelson Orlando Oduber. Y tin e parti di Eagle Beach. Tur esey a cay bao di e proyecto Watty Vos.

Esey ta parti di e storia pakico Ringweg 3 ta carga e nomber di Watty Vos, ora cu e fundacion, na memoria di Edgar Joaqin “Watty” Vos, a entrega e peticion aki, riba un 6 di augustus 2001, pasobra e proyecto aki ta Watty Vos a cuminsa cun’e na 1976.

Comments

comments