E industria di “General Aviation” no ta pasando den su miho momento actualmente. No tin mucho trafico aereo, cual ta haci e situacion un poco fastioso, door cu frontera di Venezuela ta cera y tambe situacion di Covid-19 di e ultimo aña. Aki na Aruba, aeropuerto a huur operacion completo di e terminal cu W Aviation.
Joost Meijs, director di Aruba Airport Authority NV, a indica cu den caso cu frontera cu Venezuela habri, cual ta algo na nivel gubernamental, mas sigur lo por mira cu trafico aereo tambe na General Aviation lo subi. Pero e situacion di Covdi-19, pocopoco tambe parce ta bay mas den background, cual tin indicacion cu esaki ta e caso, trafico aereo eynan tambe lo por cuminsa mehora.
Mas aleu, Meijs a bisa cu nan ta respeta e contractnan cu tin actualmente na General Aviation pero si cu nan tin algun proposicion pa por yega na un solucion a largo plaso. Pero internamente Aruba Airport Authority mes ta trahando riba esaki. Ta spera cu cualkier solucion lo por trece mas trafico aereo pa General Aviation, sea pa e operador actual of un otro den futuro.
Desde januari 2018 e compania W Aviation Aruba ta existi y ta maneha e aeropuerto priva, situa na e banda di Simeon Antonio. Riba nan website a informa cu desde inicio di 2018 nan a inverti no menos di 1.8 miyon dollar den renobacion y pa muebla e interior di e terminal, cu creacion di un lobby, area pa customer care, un bar nobo, VIP lounge, sala di conferencia, sala pa piloot, oficina pa flight planning y mucho mas.
Pero e realidad ta cu prome cu Covid-19, ya a bin e reto cu Venezuela, pa cual e pais a cera frontera cu Aruba y tabata stroba pa e avionnan priva bin staciona aki. Por corda cu prome cu esey, hopi Venezolano cu a bay biba na Miami of Panama, tabata scoge pa bin topa nan famianan Venezolano aki na Aruba. Nan tabata bin cu nan avion priva aki pa organisa vakantienan riba nos isla. Hopi di nan a hasta inverti den cas of condominio aki tambe. Pero, cu e reto pa bula di Venezuela pa Aruba, a opta pa no bin mas y asina e mercado grandi di avionnan Venezolano of di Venezolano a cay pisa.
Despues a bin Covid cu a pone cu e pasaheronan elite tabata biaha menos, pa miedo di contagia cu e virus y door di scarsedad di e avionnan aki disponibel pa huur ora di realisa e tipo di vuelonan asina. E industria a haya un sla hopi duro, pasobra di un dia pa otro, vuelonan a stop completo. E aeropuerto di avion priva mas grandi na Florida, esta Naples Airport, a bende 1 miyon gallon di combustibel na februari 2020. Dos luna despues, na april 2020, el a bende 350 mil galon, pues a cay cu 65% den un luna despues di e pandemia a dal na mita di maart 2020. Y desde e dia ey nan a perde mayoria cliente cu tabata biaha pa haci negoshi.
Ora puntra e industria ki dia nan lo bin bek, e contesta cu mas ta resona ta, mas pocopoco cu e vuelonan comercial. Asina mes, e industria ta spera cu e fin di aña aki lo por bira un poco miho. Normalmente na november caba ta cuminsa mira booking drentando pa fin di aña. Pero pa Aruba, tanten cu Merca tin e restrincion debi na Covid-19, hopi di e doñonan di avionnan priva ta opta pa bay un otro destinacion unda no tin tanto restrincion. Den caso cu elimina e medida di CDC, lo por spera un fin di aña un poco mas prospero pa e industria di avionnan priva, cu tanto nos tabata conoci pe prome cu 2018.
