Campeonato Internacional XIII femenino mayor di WBSC Suramericana / CONSURSA a continua den gran forma riba veld di Dragon Hitters ( X Duracell).
Manera ta conoso Venezuela kende a termina na tercer puesto den e promer ronda despues di 10 wega hunga a enfrenta Corsou y a elimina Corsou.
E siguiente dia Venezuela a avansa pa hunga contra e perdedor di 1 vs 2 kende porcierto tabata e equipo di Argentina. Venezuela su pitcher estrea Michelle Floyd a bolbe subi monticulo y ta lansa un gran partido derotando Argentina 4-3.
Argentina tabata gana 3-2 te den cabez di 7 inning cu 1 out faltando dos out pa pasa pa final pero manera e dicho ta bisa e bala ta rondo y Venezuela ta rally cu hitnan oportuno pa anota 2 careda y bolter e score 4-3 na nan fabor eliminando asina Argentina.
Venezuela 4 careda, 8 hit, 1 error y ta laga 10 coredor den circulacion. Argentina 3 careda, 12 hit, 1 error y ta laga 7 coredor na base. Mihor bateadornan pa Venezuela ta Jocelin Diaz di 3-2, Denisse Fuenmayor di 3-3 incluyendo 2 doblete, Yulexis Barrios y Freymar Suniaga ambos di 3-1.
Pa Argentina a destaca na plato Candela Figueroa 4-2 incluyendo 1 doblete, Dolores Fernandez 4-3, Anna Sofia Bollea y Candela Sole ambos di 3-2, Carla Villalva 2-1, Pamela Clark y Magali Frezzotti di 3-1. Michelle Floyd ta preta braza pa seya e victoria riba su nomber lansando 32 bola, 77 strike bon pa 109 lansamento propinando 5 strike out permitiendo 3 careda limpi y no ta regala base por bola.
Carina Amarilla a inicia pa Argentina y ta bay 1 solo inning y ta wordo releva pa Tamara Togni kende ta lansa 6 inning, 49 bola, 62 strike bon pa 111 lansamento regalando 5 base por bola propinando 3 strike outs y ta carga e derota riba su nomber. Venezuela asina ta yega final y lo topa Brasil mesora den e gran final pa determina kende lo bay cas cu medaya di oro. Campeonato Internacional Suramericana ta canando riba un nivel technico hopi halto. Pabien un biaha mas na tur paisnan cu ta compitiendo brindando e publico un espectaculo den deporte sin igual.
