Cada biaha tin Venezolano cu ta purba probecha di tur oportunidad pa obtene un status legal di estadia na Aruba. Despues cu alrededor di 300 persona tabata presente na DIMAS, a tende cu ningun hende cu tin status ilegal por yega na remarca pa Asilo, awor a siña con pa haci’e miho. A splica cu Asilo Politico ta ora cu realmente bo bida na peliger na bo pais. Bo lo mester avisa autoridad na bo yegada na e otro pais. Cu otro palabra manera a wordo splica, asina cu yega for di Venezuela of otro pais y yega na imigracion, bo mester avisa cu bo kier asilo politico. Parce cu hopi no tabata sa.
Te ora cu Gobierno y DIMAS a splica esey, el a bira un “eye opener” pa e otronan. Pesey Diasabra diripente e prome a yega y bisa imigracion cu e ta den problema na su pais y ta wordo persigui. Su bida ta na peliger na Venezuela y pesey kier mesora haya asilo politico. Dimes nan ta atende cune y sigui e proceso pa mira su loke e ta papia ta berdad.
Na Aruba no ta duna Asilo Politico sin mas. Ademas e homber cu a pidi asilo diasabra na su yegada conoce Aruba. El a yega di bin caba y keda akibou. El a gosa di tur loke Aruba tin di ofrece. Awor el a dicidi di bay bek despues di algun bishita. El a sinti su mes comodo na Aruba y kier core bolbe y bati na porta pa asilo.
Recientemente a yega tambe un avion cu 157 pasahero. Personal di imigracion tin extra atencion pa yegada di pasaheronan for di Venezuela. Pesey mes na dado momento a wanta 24 pasahero pa pasa e proceso extra di control. Di 24 pasahero, un total di 11 parce a wordo manda bek Venezuela. Kiermen autoridad na frontera tin wowo habri pa cualkier Venezolano cu ta bin cu intencion di keda Aruba.
