Shine Music ta den pleno preparacion pa su participacion na Soca Monarch 2027. Segun cantante Veloushka Krozendijk, e grupo ya a completa e canticanan y e cuater cantantenan principal ta sigui cu nan ultimo entrenamento prome cu e festival.
Krozendijk a splica cu e preparacionnan ta den pleno marcha y cu e grupo ta dedica e ultimo dianan na practica. Tur cuater cantante principal di Shine Music lo participa, y cada un tin su cancion cla.
Cuatro cantante, cuatro estilo
E aña aki, C-Zim ta prepara un cancion cu ta combina zonido di antes y di awor. E tema ta yama Aruban Fat. J-Rich, kende ta bek na Aruba despues di algun aña, lo participa pa prome biaha den e festival hunto cu Shine Music. Segun Krozendijk, su cancion tin un estilo mas suave, algo cu ta adapta na dje.
Banz tambe ta prepara un tema nobo. Despues di su participacion e aña pasa cu Six Seven, e cantante ta bolbe cu algo cu, segun Krozendijk, lo conecta specialmente cu e hobennan. Veloushka mes tambe lo subi escenario cu un cancion cu e damanan lo gusta.
Festival na november tin su pro y contra
Pa Krozendijk, tene e festival na november, prome cu e temporada di Carnaval, tin su bentahanan y desbentahanan. E ta considera cu cada aña ta diferente y cu ainda ta trempan pa determina con e cambio lo funciona e aña aki.
E ta recorda cu dos aña pasa e festival tambe a tuma luga na november, y awor e grupo ta spera pa mira con e publico lo reacciona.
Invitacion pa e fanaticonan
Shine Music ta invita su fanaticonan, famia, amigonan y tur hende cu ta sigui e grupo riba red social pa bin apoya nan durante e festival. E presentacion di Shine Music ta programa pa 11 of 12 di november na Centro di Bario Brazil. E fecha exacto ainda no ta confirma.
Krozendijk a describi 2026 como un aña activo pa e banda, cu participacion y bon resultado den diferente festival. Segun dje, Shine Music ta pasa pa un momento di hopi entusiasmo y e grupo ta desea di bolbe laga su marca durante e festival aki.
