Lider di fraccion di Progressief Nederland (PRO), Jesse Klaver, y parlamentario Mikal Tseggai a expresa nan sosten pa e vision di Prome Minister Mike Eman pa conecta salario minimo cu bestaansminimum na Aruba. Segun ambos parlamentario, ta importante cu hende cu ta traha duro por gana un salario suficiente pa cubri nan necesidadnan basico. E encuentro a tuma luga despues di e reunion cu e Comision Fiho pa Relacionnan den Reino di Tweede Kamer na cual e delegacion di Aruba a participa. Prome Minister Eman tabata acompaña pa Minister Plenipotenciario di Aruba na Hulanda, Mildred Schwengle, y Minister di Turismo, Transporte y Labor, Wendrick Cicilia.
Na salida di e reunion, Jesse Klaver a describi e combersacion como hopi agradabel. Durante e encuentro nan a reflexiona riba e trayectoria politico di Prome Minister Eman y su contribucion na Reino Hulandes, pero tambe riba e retonan cu ainda ta existi. Tocante e propuesta pa conecta salario minimo cu bestaansminimum, Klaver a expresa su aprecio pa e iniciativa.
“Mi ta considera esaki un vision hopi fuerte y mi ta haya hopi importante pa conecta salario minimo cu bestaansminimum. Ta dificil pa imagina cu hende mester traha pa un salario cu nan no por biba di dje. P’esey mi ta considera e paso aki uno hopi balente y realmente necesario,” Klaver a declara. Segun e lider di PRO, politica mester ta enfoca riba e bienestar di hende, specialmente esnan cu diariamente ta haci nan miho esfuerso pa mantene nan famia y ofrece nan yiunan un futuro miho. “Finalmente, nos mester haci politica pa hende. Pa tur e hendenan comun cu dia pa dia ta purba haci nan miho esfuerso pa nan mes y pa nan yiunan. No ta aceptabel cu nan ta traha duro y cu nan salario no ta suficiente pa nan por biba,” Klaver a enfatisa. E lider di fraccion
PRO a agrega cu siguridad di existencia ta un tema importante, no solamente na Aruba, sino tambe na Hulanda y den otro paisnan di Europa, caminda cada bes mas hende tin dificultad pa cubri nan gastonan diario.
Di su banda, parlamentario Mikal Tseggai a expresa su aprecio pa e reunion y p’e experencia politico di Prome Minister Eman. “Mi a haya esaki un combersacion hopi bon. E ta un homber cu tin hopi experencia den politica y cu a laga un legado hopi bunita na Aruba. E combersacion tabata instructivo, inspirador y tabata bon pa papia hunto tocante Reino,” Tseggai a declara. Tseggai, cu tin su origen politico den PvdA, a indica cu e ta considera e plan pa conecta salario minimo cu bestaansminimum un bon idea, cu ta cuadra cu e vision social di Progressief Nederland.
“Na PRO nos ta considera esaki un idea hopi bon. Tambe na Hulanda Europeo, Progressief Nederland ta traha pa un bida pagabel pa tur hende. Naturalmente, esaki mester conta den henter nos Reino,” Tseggai a enfatisa. E parlamentario a expresa su preocupacion tocante e nivel di pobresa na Aruba, cu segun dje ta considerablemente mas halto cu na Hulanda Europeo. “No por ta asina cu e cifranan di pobresa na Aruba ta hopi mas halto cu na Hulanda Europeo. P’esey nos ta duna e plan aki nos sosten di henter curason,” Tseggai a declara. Jesse Klaver ta miembro di Tweede Kamer desde 2010 y anteriormente tabata lider politico di GroenLinks. Actualmente e ta lider di fraccion di Progressief Nederland (PRO), e partido cu a surgi for di e fusion di GroenLinks y PvdA.
Mikal Tseggai ta miembro di Tweede Kamer desde december 2023. Anteriormente e tabata miembro di Consejo Municipal di Den Haag. Den Tweede Kamer, e ta encarga, entre otro, cu Relacionnan den Reino, educacion y combate di discriminacion. Na Aruba, Prome Minister Mike Eman ta impulsando un propuesta pa aumenta salario minimo gradualmente y acerca esaki na bestaansminimum, como parti di e esfuersonan pa combate pobresa y mehora poder di compra di trahadonan. E propuesta ta generando discusion den sector empresarial y politico, mientras Gobierno ta sigui buscando dialogo tocante su implementacion.
