Gobierno di Aruba ta den e fase final pa implementa un sistema nobo di control fronteriso cu lo permiti evalua pasaheronan prome cu nan yega Aruba. Ministro di Husticia, mr. drs. Arthur Dowers, a indica cu e medida ta forma parti di e esfuersonan pa fortalece siguridad y combati empleo ilegal.
E sistema nobo lo funciona di un manera similar na ESTA, unda pasaheronan mester entrega nan informacion di antemano. E datonan lo wordo compara cu diferente base di dato hudicial y policial pa determina si tin antecedente penal of alerta di siguridad.
Diferente di e ED-card actual, cu ta fungi principalmente como registro di entrada, e sistema nobo lo permiti haci un evaluacion prome di e peticion di entrada. Casonan cu haya un rechaso lo wordo revisa pa determina si e decision ta corecto. Infraccionnan menor, manera boet di trafico, no lo nifica automaticamente cu un persona no por drenta Aruba.
Multa di te na 25.000 florin pa empleo ilegal
Ademas di e controlnan na frontera, autoridadnan lo intensifica inspeccion den empresanan y sectornan unda tin sospecha di empleo ilegal di stranheronan. Segun Dowers, e medida ta busca combati contratacion iregular y evita cu trahadonan bira victima di abuso laboral.
E sancionnan anuncia ta inclui multa di Afl. 10.000 pa persona particular y Afl. 25.000 pa negoshinan cu viola e reglanan di empleo.
Gobierno ta enfoca su maneho riba fortalece control, proteha trahadonan y combati practica ilegal den mercado laboral di Aruba.
Pa mas lesa TREMPAN.
