Scol Dun’un Man a celebra su 50 aniversario, marcando cinco decada di trabou dedica na educacion y desaroyo di mucha cu necesidadnan special na Aruba. Durante e celebracion, cabesante Sharline Geerman a destaca e progreso cu e scol a logra y su meta pa amplia e oportunidadnan di desaroyo pa su alumnonan, mientras cu assistent di maestro Mariënne Laclé a expresa gradicimento na tur e patrocinadonan cu a contribui n’e siman festivo.
Actualmente, Scol Duna Man tin 53 alumno, distribui den seis klas, y un ekipo di 20 colega cu ta dedica na guia y enseñansa di e muchanan. Segun Geerman, e crecemento di e scol ta mustra tambe un cambio den e manera cu comunidad ta mira mucha cu limitacion intelectual of fisico. Cincuenta aña pasa, hopi di e muchanan aki tabata keda cera na cas y e mayornan no tabata saca nan frecuentemente pa participa den actividad.
Geerman a indica cu durante e añanan e scol a amplia su oferta educativo. Ora cu el a cuminsa como cabesante mas cu dies aña pasa, e scol tabatin ocho klas. Actualmente tin seis, pero e desaroyo di e programa educativo a inclui diferente actividad y materia nobo.
Entre e iniciativanan tin klas di creatividad, media y tecnologia. Ademas, e alumnonan ta participa den e lesnan di gimnasta, hardineria, cushinamento y e actividadnan relaciona cu tarea di cas. Segun Geerman, e enseñansa no ta limita na materia academico, sino cu ta busca desaroya e potencial di cada alumno segun su capacidad, ritmo y interes.
Un scol avansa como siguiente meta
P’e siguiente añanan, Geerman tin como meta principal e desaroyo di un scol avansa pa mucha special, un tipo di institucion cu, segun su declaracion, Aruba ainda no tin. E ta spera, cu Dios su guia, e construccion por cuminsa na februari di aña cu ta bin. Pa Geerman, e proyecto lo representa un logro importante y un paso nobo den e continuidad educativo di e alumnonan.
Comunidad y patrocinadonan a contribui na celebracion
Mariënne Laclé, assistent di maestro y miembro di e comision organisado di e 50 aniversario, a splica cu el a traha hunto cu tres colega mas pa prepara e actividadnan di e siman di celebracion.
Laclé a destaca cu e organisacion a logra haya sosten di un cantidad grandi di sponsor. Na unda a expresa gradicimento na tur e patrocinadonan y a indica cu sin nan colaboracion e celebracion lo no por a logra e mesun resultado. Durante e siman, e alumnonan a disfruta di diferente actividad, incluyendo e dianan di wega y un dia dedica na actividadnan di awa.
Pa mas lesa TREMPAN.COM.
