E siman aki a habri cu varios Director di Departamentonan di Gobierno ta bou presion di nan funcion. Parce cu varios Minister a informa algun hefe cu nan lo no keda necesariamente den e funcion. Sea cu Gobierno lo kier cambia nan pa otro of kier institui un Management Team. E ultimo lunanan aki a scucha di varios caso y despues cu nos a publica e noticia, mesora a “hala atras” e intencion, aunke cu a informa e hefenan caba di e intencion.
E siman aki a habri cu algun hefe a haya e mesun ordo atrobe y un di nan a hasta bay cas obligatoriamente pa e “pensa” durante e siman aki riba su futuro. No solamente den departamentonan di Gobierno pasobra den companianan di utilidad y petrolero di Gobierno tambe ta pasando cu e mesun machete pa cual e tension ta creciendo.
Den e departamentonan di salud publico e casonan ta conoci y ta parce awor cu a cuminsa un “heksenjacht” tras di Directornan nombra durante e ultimo gobernacion.
Ta sinti cu nan no ta di e mesun asignatura di Gobierno. Mayoria di nan ta ambtenaar nombra cu un decreto gubernamental (Landsbesluit) firma pa Gobernador, cu ta haci dificil pa kita nan for di trabou, pero si por persigui nan politicamente dor di manda nan cas cu salario.
Na DRH nan ta masha ocupa e ultimo lunanan pa implementa instruccion di varios Minister cu kier institui “Management Team” of introduci reorganisacion den e departamentonan, como un forma facil pa move hende di nan funcion.
