Cu mas di 700 participante y un record di tempo supera, diasabra dia 14 di januari ultimo e prome careda di coremento di aña Urataka Run & Walk a haci su regreso den curason di Santa Cruz. Un evento yena cu ambiente, Caribbean Mercantile Bank N.V. conhuntamente Urataka Center, ta marca e di 23 edicion di e evento deportivo aki.
Urataka Run ta un careda anual di 5 kilometer na unda tur edad, genero y nivel di preparacion ta bon bini pa participa. “Nos ta contento di ta bek y laga Urataka Center ta e punto di encuentro pa inicia e aña di careda di coremento. Cu pandemia tras di lomba e aña aki nos a ricibi tur coredo fiel, pero tambe hopi participante nobo cual pa nos ta haci Urataka Run un bes mas un evento exitoso”, asina Rigo Croeze di Urataka Center ta comenta.
Caribbean Mercantile Bank N.V. ta mira e importancia pa continuamente apoya deporte y actividadnan cu ta rondona actividad fisico. Urataka Run ta e prome evento di coremento di aña y e aña aki a mustra di ta bek mas fuerte cu nunca.
“CMB ta sumamente orguyoso di por contribui na e evento aki cu na su turno ta inspira grandi y chikito pa cuminsa aña mas saludabel”, Ilán Lopez, Communications Officer di Caribbean Mercantile Bank N.V. ta relata. CMB ta gradici Patrishi Sports pa e organisacion impecabel como tambe tur colega di e banco cu e contribui como boluntario pa haci e regreso di Urataka Run uno mas grandi cu nunca. CMB lo sigui brinda su aporte den añanan benidero cu mas innovacion y ampliacion di e experiencia deportivo aki.
