Desde re-apertura di frontera pa turismo na juli 2020, Aruba Tourism Authority conhuntamente cu otro socionan a bin ta traha hopi duro riba e protocol pa cu turistanan cu test positivo na entrada, durante di nan estadia of na salida di Aruba. E protocol aki a cana super bon. Debi na e manera positivo cu Aruba su turismo ta recuperando y e rapidez di transmision di e virus – specificamente e variante Omicron – e casonan bou turistanan ta subiendo. Capacidad pa acomodacionnan pa isolacion pa e turistanan aki ta limita debi na Aruba su “high season”.
Pa medio di esaki Aruba Tourism Authority ta haci un apelacion na tur esunnan cu tin acomodacion (apartment, por ehempel) disponibel ainda pa e proximo simannan y cu ta dispuesto pa huur, por fabor tuma contact cu A.T.A. na telefon 5664961.
Tin algun rekisito cu mester tene cuenta cu nan, entre otro: e apartment mester tin su mesun entrada/salida, e apartment mester ta den bon estado, mester tin ventilacion apropia; preferiblemente mester tin un cushina basico y WiFi. E gasto/huur di esaki ta wordo paga pa e seguro mandatorio cu tur turista mester cumpra na momento di nan entrada pa Aruba. Manera ya menciona, e maneho pa cu e protocol aki semper a wordo hiba na un forma hopi profesional y discreto, y ta sigura cu esaki lo sigui tambe asina.
