Dr. Luc Alofs actualmente ta docente universitario na Universidad di Aruba y di Corsow. E ta conoci pa investigacion y publicacionnan cu ta regarda historia y realidad social politico di Aruba. Por menciona Ken ta Arubiano (cu L. Merkies), Plantage zonder Slaven, Onderhorigheid en Separatisme.
Su ultimo publicacion ta “Koloniale mythen en Benedenwindse feiten, Curaçao, Aruba en Bonaire in inheems Atlantisch Perspectief, ca. 1499-1636”. E obra aki ta explora e asina yama periodo Spaño di Aruba, Bonairo y Corsow y e mitonan colonial describi for di perspectiva Europeo di e habitantenan indigina. Den e publicacion ta deconstrui e mitonan colonial documenta y ta presenta otro perspectiva historico decolonisa.
Museo Arqueologico Nacional Aruba (MANA) a duna su aporte pa medio di arkeologonan drs. Raymundo Dijkhoff y drs. Harold Kelly kendenan a yuda forma puente entre arkeologia y historia. Tambe MANA a pone potretnan na disposicion pa e publicacion. Como muestra di gratitud dr. Luc Alofs a haci entrega di un ehemplar di e publicacion na director interino di MANA, mr. drs. Pancho Geerman. Desde siman pasa e buki ta obtenibel gratis online via e cas editorial Sidestone Press (www. Sidestone.com) y e seccion Arubiana/Caribiana di Bibiloteca Nacional Aruba.
