Tur participante ta di acuerdo: Workshop di IDEA tabata exitoso

Diabierna merdia a finalisa e workshop “Silver Entrepreneurship Workshop for the retired or soon to be retired” cu a dura cinco dia. Hopi persona a participa den esaki y e reaccionnan tabata completamente positivo.

No menos cu 15 instancia a cera cabes pa duna informacion den e workshop.
Un di e personanan presente of envolvi den esaki tabata Zulema Dabian Erasmus, hefe di Foreign Economic Relations and Business Development”. E workshop tabata exitoso y
“sold out”. Pues no por a tuma mas hende. Tur dia e salanan tabata yen cu personanan pa scucha e diferente charlanan cu a wordo organisa door di e 15 partnernan di e evento. Nan a haya detaye for di A te Z riba con pa lanta negoshi, kico ta e proceduranan cu mester tene cuenta cu nan, y hasta ehempel di e miho of mas mal practicanan.

Tur participante ta di acuedo: Workshop di IDEA tabata exitoso

Tur participante ta di acuedo: Workshop di IDEA tabata exitoso. Click e link pa mas https://24ora.tv/2FmjvhZ

Posted by 24ora on Friday, June 14, 2019

Segun sra. Dabian Erasmus, tabatin hopi mas tema cu por a wordo hinca, pero e lo tabata demasiado pa un prome biaha. P’esey e ta kere cu mester tin mas di e tipo di eventonan aki cu mester keda organisa den futuro. IDEA ta bay traha riba un di dos edicion pa sigui traha riba e mesun tema, of temanan cu a keda sin trata.
Un di e participantenan tabata Hubert Gibbs, kende a bisa “nos a siña masha hopi di e workshop aki. Nos a haya hopi experiencia cu por yuda nos haci di nos hobby, nos negoshi.” Y el a agrega cu den su caso semper su hobby tabata trabou den construccion y plantamento. Mirando e exito di esaki, e ta kere cu mester ripiti e workshop. “Y e ta algo cu mester a bini hopi tempo pasa.”

Otro participante tabata Carla Wever, kende ya caba ta cu pensioen. “Nos a siña hopi di e tayernan di IDEA. Mi tin cu bisa cu ohala nos por a haya e informacionnan aki for di dos aña pasa caba, pasobra awe mi lo tin mi mesun negoshi.”
Tin hopi demanda pa ripiticion di e workshop pero pa ki tempo esaki ta bay tuma luga, Dabian Erasmus a bisa cu mester consulta cu e partnernan.
Minister di Finanza Xiomara Ruiz Maduro, kende a bini cu e idea aki, tabata presente pa haci entrega di e certificadonan. El a expresa di ta masha contento cu e entusiasmo di e participantenan y a bisa nan “semper kere den bo mes, y kere den bo pais, y bo lo ta exitoso”.

Comments

comments