E evento tan anticipa pa nos Rubianonan na Hulanda, Paranda Rubiano, a pone tur hende riba pia ta baila riba diferente ritmo di nos cantante y artistanan cu a bay Hulanda pa buta un tremendo show. For di Ataniro, Rocco Franken, te cu Mervin Baptiste, Nicole Manzo y Eldwin Kock y mas, tur hende a gosa di e ambiente total cu tabata tin aya na Paranda Rubiano.
“Nos a bin pa duna publico loke nan a spera di nos, esey nan a haya, e ambiente, cosnan bieu, cosnan nobo, show. Demostra cu Rubiano ta sostene Rubiano completo,” segun Janiro ‘Ataniro’ Eisden. Tabata tin naturalmente tambe hende for di otro islanan mane Corsou y Boneiro presente, di Latino America tambe cu a bin disfruta di henter e show.
Pa Rocco Franken esaki tabata un experiencia dushi di por tambe mira algun cara cu tin hopi tempo sin wak. “Y canta p’e pueblo di Aruba cu ta biba aki na Hulanda cu no ta haya esaki pa experiencia. Contento di por a experiencia esaki hunto cu nan,” segun Rocco Franken, kende tabata acompaña riba stage pa Irsais. For di ora cu Rocco Franken a laga sa cu e lo presenta na Paranda Rubiano, Irsais tabata on y haci su best pa e por t’ey. Rocco ta preparando fuerte pa un Musical cu lo tuma luga na Corsou pronto yama ‘Tula e Heroe’, tin tambe ArubaDag y preparacionnan pa Zomer.
Mervin Blacky Baptiste tabata hopi contento di por a presenta tambe na Paranda Rubiano lagando sa cu di berdad e hendenan a trece e energia anto e show tabata un exito tremendo. Pa Nicole Manzo el a bay super bon tambe. “Mi a pasa hopi bon riba stage, mi a sinti e vibe di e publico, e tabata un dushi tempo.”
Anthony Arends di Deal Entertainment ta bisa cu e ta kere e imagennan lo papia pa nan mes. “Nos tabata tin un tempo duro pero nos a pensa un rato cu e cos mester bay, mi a bisa Caribang keda kere den dje y bo por wak e resultado. Paranda Rubiano 2.0 exito atrobe, dus historia,” segun Anthony Arends ta expresa. Tur cos ta den bista awor p’e siguiente evento grandi pa Rubianonan na Hulanda, ArubaDag.
