Awe diasabra, 15 di februari, tin te cu 2’or pa paga number di vehiculo di motor na Departamento di Impuesto. Mevery Romano, vocero di DIMP, a indica cu nan a pone cuater diasabra disponibel durante luna di februari. Tin un diasabra mas pa bay, cual ta dia 22 di februari.
Tin cu bisa si cu comunidad por lo general no ta haci uzo di e oportunidad aki manera cu a spera. Berdad a haya basta cliente, pero e no ta e cantidad cu a spera. Diabierna casualmente a ricibi e ultimo cifranan y e ta mustra cu 45% di e cantidad di numbernan cu tin registra, no ta paga ainda.
Esaki ta 39.731. Tin 8 dia mas di trabao, pasobra e deadline ta dia 28 di februari. Ainda ta mira cu falta e cantidad aki. Kiermen ya tur hende por mira caba cu den e dianan nos dilanti, ta bay bira sumamente druk. E ta bay bira dado momento hasta asina druk cu si logra di duna e cantidad di numbernan cu por duna segun nan capacidad, ta bay cera e mashin y no ta bay duna number.
Kiermen bo por haya cu clientenan ta bay cuminsa keha por ta, pasobra nan no a haya e oportunidad pa paga. Loke por bisa ta cu esnan cu no ta bin paga na Camacuri of cualkier otro di e oficinanan, pa sea asina bon pa haci e pago online. Esey tambe ta facil, e ta sigur, e ta hopi conveniente tambe pa e cliente.
Pero e clientenan cu kier paga na DIMP, tin cu tene cuenta cu e dianan cu ta sigui ta bay ta sumamente druk.
Awe mes diasabra a saca un gran parti di e personal. Tin tur seis cahero trahando, pa brinda e servicio mas hopi posibel pa asina por evita cu den e dianan cu ta sigui ta bay bira hopi mas druk, mucho mas gepak di hende.
Pero ta compronde cu ta temporada di carnaval tambe, pero dado momento mester pone un rato den balansa, sea carnaval of sea cumpli cu e obligacion di number di auto. Despues di dia 28, loke ta bay pasa, departamento di impuesto, ta bay draai e naheffingnan. E naheffingnan ta bay draai cu 50% di boet.
Si e belasting ta 300 florin pa aña, 150 florin ta mita aña, lo bay pone 75 florin riba e suma cu mester paga di e 150 cu lo mester a paga pa mita aña. Esaki ta un gasto cu no ta necesario. Loke ta conseha clientenan pa sea asina bon di no laga te na ultimo. No warda te na ultimo. Yega na Departamento di Impuesto. Tin te cu 2’or di merdia awe. Tin hopi espacio. Tin e caheronan disponibel cu ta cla pa sirbi. Na e momentonan aki e waiting time ta mas of menos 5 minuut of hasta menos. E cliente ta drenta y e ta sali mesora.
E ta asina facil, bo ta keda cla hopi mas lihe. Recomendacion ta pa haci uzo di e oportunidad aki, pasobra diamars awo, por ehempel, ta bay tin e fecha final pa BBO. Ya caba sa cu e conexion BBO ta bay ta asina druk na DIMP. Ta haya e comerciantenan cu ta bin paga e BBO of toeristenheffing. Esnan cu kier bin pa number di auto, mester bay warda tambe.
E drukte ta bay keda bira mas hopi. Ta awe, dia 15 di februari, falta ocho dia mas di trabao cu por duna e servicio ey. Mirando cu falta casi 40 mil number pa pago ainda, por mira caba, si conta un averahe pa dia cu ta casi 5 mil persona lo mester paga pa dia. Si di e 5 mil ey, un dos mil yega na Camacuri pa haci e pago, no por atende e cantidad ey pa dia. NI mas cu kier no por.
Dado momento lo yega un momento cu ta stop di duna number pasobra no por acepta mas cliente. Tin cu tene cuenta cu e caheronan y tambe tin cu tene cuenta cu e siguridad, cu dado momento no por yena e luga cu asina hopi hende.
Esaki ta un bon oportunidad. Ta pidi pa haci uzo di e chens aki. E ta algo cu den un rato un persona por yega DIMP y e ta keda cla masha lihe.
