Diabierna mainta famianan a haya e confirmacion definitivo cu e tres piscadonan deteni na Aruba ta den libertad y lo ta biahando pa Aruba e mesun dia ey.
Ta trata aki di Reangulo Eduardo Stamper, kende tabata compaña di Robert Laveist y Franklin Vos.
Famianan despues di a ricibi e noticia aki y e ora di yega, a yega na waf di Barcadera den oranan di atardi. Segun por a compronde, nan a confronta algun problema cu e boto pa cual nan yegada a keda retrasa. Nan a yegada te despues di 8.30 di anochi, na waf di Barcaderaa, cu un alegria grandi di por ta bek na nan pais, despues di a pasa den un odisea, pa yame di un forma.
Tur e problema di e piscadonan aki a cuminsa ora cu nan a bandona Aruba rapidamente dia 3 di maart pa busca un amigo di nan cu tabata perde riba lama. Ta parce cu na Colombia a menciona cu a haya un curpa y un telefon solar na e costa y a pensa cu tabata trata di nan amigo Pau Rasmijn. Sin pensa dos bes e tres amigonan a subi un boto y a coy rumo di e area yama Las Castilletes.
Sinembargo e area aki ta dividi den dos parti, un ta cay den teritorio Colombiano y e otro den e parti Venezolano. Pa nan mala suerte a yega na un beach, morto cansa y a resulta cu tabata Venezuela. Autoridadnan a yega na e cas cu a brinda nan ayudo pa detene nan. E motibo ta entrada illegal na e pais, y riba dje e frontera di Aruba cu Venezuela ta cera.
For di eynan a transporta nan pa Maracaibo unda nan a keda deteni te cu ayera. Ya caba un biaha a haya chens pa bandona Venezuela pero tabata net den e temporada di coronavirus. Ayera sinembargo, net 4 luna despues cu nan a bandona Aruba, a haya tur permiso pa bolbe Aruba.
Pau Rasmijn a bay sambuya algun dia prome cu 3 di maart y nunca mas a subi bek.
