Trahadonan di Radiologia a cansa: problemanan di ventilacion ta keda tuma luga na HOH

E problema di e departamento di Radiologia di hospital (HOH) no ta un problema di awo, segun presidente di ABV, Gina Maduro. Ta un problema di basta tempo caba.

Desde Februari nan a start bek e boiler. Si bo laga e boiler paga, tin alivio pa e parti di radiologia, pero tin efecto pa e bedtower, caminda cu no lo tin awa cayente ni ventilacion suficiente. Esey a pone cu a a start bek e boiler cu tur e consecuencianan cu tin awor aki, caminda cu e departamento di Radiologia ta mas afecta.

 

A afecta e parti di ventilacion, holo di substancianan y tambe e parti di schimmel. Esey ta pone cu diferente biaha tin problema y promesanan a wordo haci, pa bin cu un mehoracion y cambionan pa mehoracion. Ainda, desde un luna pasa e trabao ta para. No tin ningun trabao ta tumando luga. Mientras tanto e problema di ventilacion a keda un problema. Awor aki hospital, e trahadonan no por haci uzo di e edificio aki. En principio, nan no tin nada di haber cu e problema aki di bouw. E problema di bouw ta birando un problema si pa e parti di gerencia. Pasobra e dunado di trabao mester salvaguardia e siguridad di e trahadonan, cual no tin awor aki. Esey a pone cu e trahadonan a bisa ta basta.

For di diaranson a palabra, pero diabierna no tabata tin nada concreto, cu awe trahadonan a pone trabao abao. Nan no ta pafo, nan ta den nan koffiekamer, wardando kico ta e contestanan. Mientras tanto e pashentnan ta esunnan perhudica, pasobra door cu no ta dunando e servicio adecua, e afspraaknan a wordo cancela. Solamente casonan di urgencia ta wordo atendi. Tur pashent cu tabata tin cita di basta tempo caba, lamentablemente awe mainta ora cu a presenta mester a tende cu nan cita a wordo cancela.