Trahadonan di GKMB kier pa minister reuni cu nan pa atende cu nan situacion

Empleadonan di GKMB a pone trabao abao. Nan tin un malcontento, caminda nan ta bisa cu na momento cu e gobierno a sinta, nan no a haya oido di nan y nan kier papia cu e minister tambe.

E minister en cuestion, esta Dangui Oduber, a ataca mesora sindicato, siendo cu no a haya ningun dia un yamada di e sindicato riba esaki. Mas bien a haya yamada di trahadonan cu ta preocupa y cu kier comunic cu e mandatario.

Trahadornan di GKMB a sali protesta na Barcadera

Posted by 24ora on Tuesday, April 16, 2019

Shopsteward di SEPPA, Efraim Lampe a conta riba e situacion cu a pone cu e trahadonan a sali bin afo diamars mainta.

No ta SEPPA a manda pidi un reunion, sino e trahadonan, kendenan a firma un lista pa pidi un reunion cu minister.

Dia 4 di Juli a sinta cu minister, cual tabata un bon reunion tambe. A sali hopi contento, pa motibo cu minister tambe ta di acuerdo cu e trahadonan pa haya un gevarentoelage. El a priminti cu e lo traha duro pa nan hay’e.

Dia 12 di Maart, ta haya contesta, caminda cu ta bisa cu DRH a rechasa e peticion di Departamento di Salud Publico (DVG). DVG ta salubridad publico. E ta un departamento mama cu ta percura pa salud di henter pais Aruba. Ta bay nenga un peticion di DVG, e shopsteward ta cuestiona.

Ora cu un departamento ta manda un peticion pa su trahado haya gevaren toelage, pa motibo cu nan sa cu e trahado ta traha den peliger. Nan ta riesga nan bida. Pesey a mande. Pero no ta mande por nada, no ta manda pa manda. Nan a haci na investigacion prome, pa nan por haci e peticion aki.

Y awo ta haya un contesta cu e peticion di DVG a keda rechasa. E ta inaceptabel, segun Lampe. E trahadonan no ta guli’e facil.

Motibo

E trahadonan ta traha den peligernan halto. Ora cu drenta mangel, no sa si bo ta sali mesun bon, ora cu bo a drenta of ta sali mancaron. E edificionan cu ta verval, casi cay den otro, tin cu drenta den e edificio y trata e criaderonan. E riolering cu tin rond, banda di caminda, tin cu para riba caminda. Wak cuanto hende ta haya accident debi na trafico. E trahadonan ta core riesgo, door di trata esaki. Mester trat’e, pasobra ta riesgo di sangura.

Atencion di minister

Minister Oduber a indica cu el a duna hopi atencion na e situacion di e trahadonan. Hopi cos cu tabata pendiente a percura pa esaki wordo regla. E no sa si ta sindicato of shopsteward ta geef door na e trahadonan di GKMB.

Segun Lampe, tin cuater trahado pa haya promocion y e punto cardinal tambe ta e gevarentoelage. Personalmente Lampe tabata tin contacto cu su coordinador. Pero e punto ta, e contesta cu a haya dia 12 di Maart, nan no ta di acuerdo cun’e. E intencion ta haya un reunion pa sinta cu minister riba e contesta cu nan a haya di DRH y e trahadonan, hunto cu e mandatario, kende a bao di acuerdo na Juli 2018, pa wak con ta sigui traha riba e asunto aki. E riesgo ta haltisimo.

Si e minister bin cerca nan na Barcadera of e trahadonan bay na Bestuurskantoor nan ta dispuesto, basta cu nan sinta hunto.

Lampe a sigui comenta cu e minister a regla protective gear, pero e no ta apto pa e insecticida venenoso cu nan ta traha cun’e. E coverall eynan no ta adecua pa e tipo aki.

E trahadonan a duna minister un rapport, caminda ta para con pa atende cu e insecticidanan, kico pa bisa, etc. A dune copia di tur e peligernan cu e trahadonan ta topa cun’e tur dia riba veld.

No sa si e mandatario of DRH a lesa e rapport aki. Pero e trahadonan di GKMB si sa, cu DVG a haci nan investigacion. Sino no a manda pidi pa un compensacion. E trahadonan kier un reunion urgente riba e puntonan aki.

E minister a manda contesta e carta di e firmantenan, unda cu nan ta pidi reunion, pero a mande SEPPA. E trahadonan no a manda pidi contesta, sino nan a manda pidi un reunion.

Protesta

Ora un trahado ta sali protesta, e kier atencion di e minister pa reuni riba e puntonan aki. Nan no ta sali por nada. Ya pa algun dia caba, for di dia 3 di April ta manda pidi un reunion y ainda no a haya reunion cun’e. Contesta si, pero contesta bashi, segun Lampe.

Awo nan a sali y cu un mensahe pa reuni cu e trahadonan. Lampe a haci un peticion na e minister pa por fabor, bin atende cu e trahadonan y reuni mas pronto posibel.

Comments

comments