Gerencia di Aruba Tourism Authority (ATA) a percura pa mehora e condicionnan general di nan trahadonan y garantisa un sistema estilo “prestatie management”, den cual ta premia esunnan cu ta traha bon, financieramente. Miho bo traha, miho evaluacion bo haya di bo hefe, miho bo salario ta. Asina mes, banda di esey, a regla un aumento general mara na e nivel di costo di bida. Anualmente ta adapta salarionan basa riba e nivel di inflacion, stipula pa gobierno.
Un di e rekisitonan vigente pa ATA ora cu el a bira un entidad Sui Generis na aña 2011 tabata pa inicia e proceso pa yega na un acuerdo colectivo (CAO) cu su empleadonan. Como parti di e proceso aki, empleadonan a scoge pa representacion sindical. Por medio di un referendum a vota pa e sindicato cu lo representa empleadonan di ATA, unda cu a scoge sindicato STA. Cu STA a logra firma dos CAO den transcurso di añanan.
Despues di 10 aña, aña pasa a tuma luga un referendum unda empleadonan di ATA a vota pa un sindicato nobo pa representa nan, den e caso aki Federacion di Trahadonan di Aruba (FTA). Den luna di september 2022, reunionnan y dialogo a cuminsa cu sindicato pa asina ambos partido sa kico ta puntonan di importancia pa cu cada banda.
E CAO nobo ta vigente di 2023 pa 2025. A tene cuenta cu e programa di compensacion cu ya ta vigente unda cu adelanto di salario ta mara na prestacion di un empleado (ATA su “Performance Appraisal System”). Tambe a tene cuenta cu tasa di inflacion y con, banda di e programa di compensacion mara na prestacion, esaki por impacta miembronan di ekipo di ATA.
Importante tabata tambe cu a reconoce programanan cu ATA a introduci durante añanan. Incluyendo ATA su “Flexible Working Arrangements”, su “Wellness Program” y su “Creative Room”, tur introduci na aña 2022. Asina ta sigui amplia e enfoke riba bienestar di e miembronan di ekipo. Un aspecto cu despues di e pandemia a bira aun mas importante.
ATA ta conta cu miembronan di ekipo internacional tambe, cu ta traha pa medio di e oficinanan na Merca, Colombia y Hulanda. Hopi programa y beneficio ta similar, pero obviamente cada mercado ta diferencia considerando leynan y normanan cu ta diferencia for di esun di Aruba. ATA ta orguyoso di por reconoce tur pa nan esfuerso y dedicacion pa medio di entre otro e programa di “You Anniversary”.
Ambos partido a maneha e negociacionnan den forma rasonabel teniendo cuenta cu e situacion na Aruba, pero tambe e salud financiero di e organisacion y mas cu claro bienestar y progreso di e miembronan di e organisacion.
Gerencia di ATA ta sumamente satisfecho con e reunionnan a bay y ta gradici Jose Figaroa, presidente di FTA, Rudy Geerman, vice-presidente di FTA, Ryan Giel, director di departamento di negociacion di FTA y Jonathan Boekhoudt, como shop steward di FTA den ATA.
