Diaranson 19 di april, Bucuti & Tara Beach Resort, e unico hotel den Cairbe cu certificacion di neutralidad di carbon, a cuminsa celebra Siman di Mama Tera c’un exitoso limpiesa di e beach di Eagle Beach.
E evento di e aña aki tabata testigo di un participacion impresionante, di un grupo di 26 huesped y asociadonan di e resort, 57 mucha di scol y dos docente sumamente entusiasma, Paola Pappers y Chantal Ruijven, di Mon Plaisir Basiscchool y diesdos (12) boluntario di Aruba Airport Authority (AAA). Nan tur a bini hunto pa duna bek n’e medio ambiente y e comunidad pa medio di e limpiesa di e beach.
E acto a cuminsa c’un discurso inspirador di Prome Minister di Aruba, mr. Evelyn Wever-Croes, den cual el a destaca e importancia di Siman di Mama Tera, turismo sostenibel y e cuido di nos beachnan y di nos medio ambiente pa e futuro generacion. Siguientemente, e participantenan a haci limpiesa den un area di un (1) kilometer di Eagle Beach, recogiendo desperdicio pa yuda mantene e beach intacto y pa proteccion di e bida marino.
“Nos ta sinti nos hopi honra pa e apoyo sin igual y e compromiso mustra pa e Prome minister di Aruba, mr. Evelyn Wever-Croes, e muchanan di scol y e docentenan di Mon Plaisir, e huespued- y asociadonan di Bucuti y Tara, como tambe e boluntarionan di Aruba Airport Authority (AAA) pa haci e limpiesa di nos beachnan en conexion cu Siman di Mama Tera un exito rotundo. Nos ta gradicido tambe na De Palm Tours pa a patrocina e transporte di e mcuhanan. Na Bucuti & Tara semper nos a kere firmemente cu sostenibilidad no ta solamente un compromiso, sino un forma di bida. Nos limpiesa di e beach den cuadro di Siman di Mama Tera tabata un recordatorio poderoso di cu nos por tin un impacto positivo riba nos planeta ora cu nos uni como comunidad. Laga nos sigui traha hunto pa crea un futuro mas briyante, mas limpi y mas sostenibel pa nos tur,” Crescenzia Biemas a bisa na nomber di Bucuti & Tara Beach Resort.
INSPIRA E PROXIMO GENERACION DI ECOLOGISTA
esaki ta e di dos aña consecutivo pa Mon Plasir Basisschool ta uni su mes na Bucuti & Tara pa limpiesa di e beachnan durante Siman di Mama Tera. Den palabra di Paola Pappers, docente na Mon Plaisir: “Nos ta kere cu ta crucial pa educa nos yiunan den sostenibilidad. Nan ta e futuro y nos kier ekipa nan cu e conocimento necesario pa crea un miho planeta. Finalisa nos proyecto c’un limpiesa di e beachnan ta un experiencia increibel pa nan, pasobra cu nan tin e oportunidad pa participa y contribui activamente na medio ambiente. E ta un oportunidad pa nan pone den practica loke nan a siña y nan sinti nan mes capas di cambia e cosnan. Manera e dicho ta bisa: “Jong geleerd oud gedaan”: siñanan di chikito y nan lo sigui hacie corecto henter nan bida. Ta realmente hopi alentador di wak nos generacion asina entusiasma y comprometi cu nos planeta.
E rama benefico di De Palm Tours, The Giving Palm, tambe a uni su mes cu Bucuti & Tara y e studiantenan di Mon Plaisir Basischool pa apoya e limpiesa di nos beachnan den conexion cu Siman di Mama Tera. “Como parti di nos compromiso pa duna bek n’e comunidad, crea conscientisacion pa medio ambiente y sostenibilidad, The Giving Palm ta orguyoso di a provee transporte pa e studiantenan cu a participa den e ‘beach clean up’. The Giving Palm ta mantene su compromiso di apoya e organisacion- y iniciativanan local cu ta alinea cu su mision di duna bek na comunidad y preserva e recursonan natural di e isla,” Astrid Winterdal, representante de De Palm Tours, a indica.
Bucuti &Tara ta hopi complaci di cu Aruba Airport Authority (AAA), un lider di turismo sostenibel den sector di aviacion, a uni su mes n’e ‘beach clean up’ cu nan grupo di boluntarionan dedica, Wings of Hope.
En bista di e enfoke di nos compania riba SDG, AAA frecuentemente ta asocia su mes cu otro entidad/companinan den e proyecto-of eventonan na beneficio di e comunidad. Turismo ta sigui ta e pilar principal di Aruba su economia y sigura su mes di cu nos residente- y bishitantenan por haci uzo di nos bunita beachnan di un manera sigur ta di suma importancia pa AAA,” segun Angeline Flemming, Directora di Salud, Siguridad y Sostenibilidad di AAA.
UN LEGADO DI RESPONSIBILIDAD MEDIOAMBIENTAL
E compromiso di Bucuti & Tara cu e conservacion di medio ambiente ta bay mas aleu cu e celebracion di Siman di Mama Tera. Durante e ultimo 30 añanan, cada di tres diaranson di luna, Bucuti & Tara ta organisa un ‘beach clean-up’ di Eagle Beach. Directiva, asociado- y huespednan ta bini hunto pa duna bek n’e comunidad y mustra nan aprecio pa e beyesa di e beachnan di Aruba.
Anualmente, aproximadamente ta recoge 500 liber di desperdicio for di e beach. E limpiesanan mensual ta bira un tradicion pa hopi huesped, cu di manera entusiasma ta uni nan mes den e esfuerso di mantene e beach impecabel y e bida marino proteha. E dedicacion na proteccion medioambiental no ta solamente un evento ocasional. E ta un di e hopi iniciativanan cu ta demostra e compromiso di e resort pa cu sostenibilidad.
Bucuti & Tara ya caba a pone e nivel hopi halto cu su exitoso ‘beach clean-up’ y awo e resort tin su bista poni riba e resto di e actividadnan cu nan tin planea:
· Concurso di manualidad recicla: Cada aña, relaciona cu Siman di Mama Tera, e empleadonan ta laga nan imaginacion los pa crea obranan bunita di arte recicla for di obhetonan di Bucuti & Tara. E invitadonan ta actua como hues, cautiva pa e creatividad, pasion y ingenio.
· Planta mata den e reserva natural: Cu e reciente inauguracion di e Reserva Natural Bucuti GMC, den cuadro di e 35 aniversario di e resort riba Dia di Mama Tera lo planta 54 mata den e reserva natural. Ta invita e socio- y huespednan, como tambe e publico en general pa participa den e esfuerso aki di reforestacion cu ta proporciona aire limpi y ta sirbi como deposito di carbon pa e zona.
· Cine den aire liber: E tradicion quincenal di e resort di invita e huespednan di relaha nan mes riba e stoelnan riba beach y wak un pelicula den aire liber lo conmemora Dia di Mama Tera c’un
funcion special dedica na cuida un di otro door di cuida nos planeta.
Pa mas informacion tocante Bucuti & Tara Beach Resort, bishita Bucuti.com
