Recientemente Minister di Transporte, Comunicacion y Sector Primario, Chris Romero, a reuni cu piscadonan John Laurens y Dano Carolina, pa amplia mas riba e sistema di Gedoogbeleid pa tiramento di pisca. Durante e reunion aki a informa e piscadonan riba e proceso pa trata e landsbesluit, unda mester finalisa cu tur rekisito pa por tira pisca.
Tambe Minister Romero a informa e piscadonan cu e proceso di inscripcion pa por bin na remarca pa haya e permiso di tira pisca, ta tumando luga y e interes ta bastante positivo. Siguientemente mester bin cu e proceso di registracion di harpun pa asina e tiradonan por haya nan permisonan permanente. Den e diferente topiconan treci dilanti durante e reunion aki, a papia tambe riba e sitionan cu por eherce tiramento di pisca.
Di parti di e piscadonan Minister Romero a haya diferente conseho y punto di bista pa cu zonificacion y areanan mas adecua pa tiramento di pisca. Pero tambe e piscadonan a comparti cu Minister Romero nan experencia personal den e mundo di pesca y na mes momento expresa nan satisfaccion cu finalmente, despues di tanto tempo, nan por realisa nan practica legalmente pa por sostene nan famia.
Tabata un reunion bastante fructifero unda cu a haci palabracionnan concreto y a reafirma e compromiso di mantene un comunicacion estrecho.
