E demanda pa cuido di salud mental na Aruba ta creciendo, pero e capacidad pa atende e demanda ta keda limita. Na Respaldo, mas di 2.000 persona ta actualmente activo den tratamento, mientras cu e organisacion ta enfrenta falta di cama, espacio y personal specialisa.
Milouschka Boekhoudt, Manager di Zorg na Respaldo, ta pinta un imagen di un organisacion cu ta ofrece hopi mas cu solamente tratamento den e seccion di opname. Respaldo ta brinda ayudo na alrededor di 2.132 cliente activo y tin aproximadamente 500 persona cu ta ricibi guia na cas, incluyendo di trahadonan social y enfermeronan.
Pero e parti cu publico ta mira mas frecuentemente — e opname pa casonan agudo — ta hustamente un di e partinan cu tin capacidad limita.
“Esey ta un parti chikito di Respaldo. Pasobra e parti ey ta loke cu mi ta kere e comunidad ta sinti e mas.”
Nuebe cama y dos camber di isolacion
E edificio cu Respaldo ta uza ta e antiguo PAAZ di Hospital na Horacio Oduber, un edificio cu ta casi 40 aña bieu. Respaldo no ta doño di e edificio, sino ta huur e espacio di hospital.
Den e parti di opname agudo tin nuebe cama y dos camber di isolacionto. E cambernan tin un funcion importante: permiti cu pashentnan cu ta psicotico, agresivo of den un estado mental severo por wordo admiti mientras cu nan mes, otro pashentnan y personal, ta wordo proteha.
E limitacion ta bira particularmente visibel ora e cambernan di isolacion ta yen.
Segun Boekhoudt, si un pariente den isolacion no ta suficientemente stabilisa pa move pa e sala general, e cama no por wordo libera. Esaki ta nifica cu un otro persona cu mester drenta, no por haya un cama mesora. ““Si nos isolacion ta yen, nos no por admiti ni un cliente mas.”
E situacion ta pone un pregunta mas grandi: cuanto e actual sistema di salud mental por carga mientras cu e poblacion y e demanda ta sigui crece?
Segun e manager, e reto no ta solamente cantidad di cama. Respaldo tin diferente servicio pa adulto, mucha y hobennan, y ta traha hunto cu organisacionnan den e comunidad.
Na Mahuma, Respaldo tin servicio pa adulto, muchanan y hobennan cu problema di salud mental. E muchanan no ta wordo admiti pa keda den e edificio, sino ta bin pa citanan y tratamento y despues bolbe nan ambiente habitual.
Respaldo tambe ta traha cu dokternan di cas, Sociale Zaken, FCCA y otro organisacionnan. E meta ta yuda clientenan no solamente durante un crisis, pero tambe ora nan ta bolbe biba den comunidad.
E organisacion tin tambe un servicio pa mamanan na estado cu ta pasando pa problema di salud mental durante embaraso. Segun Boekhoudt, ta atende e casonan mesora y no ta pone riba un lista di espera.
Un lista di espera cu ta constantemente yen
Respaldo tin un lista di espera, pero segun Boekhoudt, e lista ta dificil pa move pasobra mientras cu clientenan ta wordo atende, continuamente ta drenta caso nobo.
E organisacion ta un servicio specialisa. Esaki ta nifica cu no necesariamente tur persona cu ta referi pa Respaldo mester tratamento den e nivel specialisa.
E ekipo mester evalua e casonan y, den algun situacion, manda un persona bek pa e prome linea. Den otro caso, e ekipo ta dicidi cu, apesar di e referencia original, e persona ainda mester wordo yuda door di Respaldo.
E proceso di seleccion ta pone mas presion riba un sistema cu ya ta lucha cu capacidad limita.
Un edificio nobo como posibel cambio
Mientras e demanda ta creciendo, tin un iniciativa pa construi un edificio nobo pa Respaldo. Fundacion Mama Tisa ta yuda cu e proyecto, cu tin como meta crea un espacio cu por atende e necesidadnan di salud mental di Aruba.
E proyecto no ta solamente pa agrega cama. E ta relaciona cu e pregunta mas grandi di con Aruba kier organisa su sistema di salud mental pa futuro.
Cu poblacion creciendo, mas persona buscando tratamento y mas demanda pa servicio specialisando, e actual capacidad ta wordo pone cada bes mas bou di presion.
Pa Respaldo, e pregunta ya no ta si tin suficiente demanda. E cifra di clientenan ta mustra cu e demanda ta presente. E pregunta ta cuanto tempo e sistema actual por sigui cumpli cu e demanda.
