Un momento special a tuma luga dialuna atardi den bario Dakota, caminda Shimarukustrat a haya oficialmente e nomber di Caya Jose Maria “Jo” Dania, como reconocimento na un di e personanan cu durante hopi aña a contribui na bida di e comunidad.
Jose Maria “Jo” Dania, cu a fayece na edad di 102 aña, tabata un figura ampliamente conoci den Dakota. Segun e personanan cu a papia durante e acto, su influencia tabata pasa mas aya di su propio famia, ya cu su porta semper tabata habri pa hoben, muchanan y habitantenan di bario.
Presidente di Parlamento, Marlon Sneek, a describi Jo Dania como un berdadero baluarte di Dakota y un persona cu a haci e bario bira mas conoci tambe pa personanan for di otro barionan.
“Nos ta mira cu Shimarukustrat awe ta haya nomber di Caya Jose Maria ‘Jo’ Dania, un baluarte di bario aki, un baluarte cu a biba te cu su 102 aña”, Sneek a bisa.
Segun Sneek, Jo Dania tabata cumpli un papel importante den e comunidad como un figura cu hendenan tabata respeta y cu tabata dispuesto pa duna guia na hoben y famianan.
El a recorda con Jo Dania tabata considera e bario como un gran famia, caminda cada persona por a conta cu su guia y experiencia. E Presidente di Parlamento a destaca tambe cu hopi hende di diferente bario a bin Dakota pa disfruta di e famoso frionan cu Jo Dania tabata prepara.
Reconoce persona cu a carga bario
Minister di Relacionnan den Reino, Enseñansa, Hubentud, Innovacion y Deporte, Gerlien Croes, a destaca cu e reconocimento a tuma forma despues di un proposicion cu a tuma varios aña pa finalisa. Croes a bisa cu e gobierno a considera importante reconoce personanan cu a contribui na e identidad y desaroyo di nan bario.
“Den e caso aki señor Jo Dania pa añanan, un baluarte di Dakota cu a edifica pa hopi persona, pa hopi hoben, pa hopi famia añanan tan largo”, Croes a bisa.
E minister a destaca cu Jo Dania no solamente a contribui na e sentimento di comunidad, pero tambe na e educacion di e bario. Durante e acto, varios anecdota di su bida tabata comparti, loke a mustra e impacto cu el a tin riba diferente generacion.
Croes a haci un yamada pa Aruba sigui reconoce personanan cu a contribui na identidad di nan comunidad. “Tur bario tin su personanan cu a carga e identidad di e bario pa añanan, y den e caso aki no ta diferente cu Dakota y Jo Dania”, el a declara. Pa famia Dania, e cambio di nomber di e caya tin un significado profundamente special.
Orguyoso di e reconocimento
Joan Dania, nieta di Jose Maria Dania, a conta cu e famia ta sumamente contento cu por presencia e momento, aunke su welo no por a ta presente. “Mi ta hopi contento cu por presencia esaki, mas cu mi welo no t’ey cu nos, pero mi sa cu den cielo e ta hopi contento”, Joan a bisa. Un di e recuerdonan cu Dania ta carga di su welo ta relaciona cu e famoso frionan cu el tabata prepara. El a conta cu Jo Dania a siñ’e con pa prepara e frionan y cu pa un periodo e mes a yuda traha y bende nan.
Pero mas aya di su frionan, Joan a recorda su welo como un persona cu semper tabata habri su porta pa hendenan. Segun Joan, muchanan di scol tabata bin cerca Jo Dania pa yuda nan cu nan trabou di scol, textonan y preguntanan.
“Tur mucha tabata bin semper cerca mi welo pa haci esey”, el a conta.
Irshkienne Desabrida, bisanieta di Jose Maria Dania, a expresa e orguyo di e famia durante e momento special. El a bisa cu e famia ta hopi orguyoso y cu e reconocimento ta algo cu nan nunca a imagina.
Pa e famia, e hecho cu Jo Dania a yega na 102 aña tabata un gran bendicion. Como varios miembro di e famia ta biba na Hulanda, no tur hende por a ta presente pa celebra su aniversario cada aña. Pa e acto aki, sinembargo, nan a haci tur esfuerso pa ta presente aunke no tur por tabata presente.
E famia a expresa su gradicimento na pueblo di Aruba y na tur esnan cu a contribui pa haci e reconocimento realidad. Cu e cambio di nomber di Shimarukustrat, memoria di Jose Maria “Jo” Dania ta keda conecta directamente na Dakota, e bario cu a forma un parti importante di su bida y caminda su legado ta continua biba den memoria di su habitantenan.
