Diamars a tuma luga e Congreso Nacional “TOS, Taalontwikkelingsstoornis: Un barera invisibel.” E evento a reuni diferente stakeholder, profesional y experto di e area social y di salud pa papia y conscientisa e comunidad tocante e trastorno aki.
Kristel Vis-van Nes, manager di FEPOH, a duna un introduccion cla riba e meta di e congreso y e impacto di TOS den bida di un mucha. “Awe, 6 di october, FEPOH ta organisando e Congreso Nacional ‘TOS, taalontwikkelingsstoornis: Un barera invisibel’ na Renaissance Convention Center”, el a indica.
E ta haya cu tur stakeholder hunto mester papia y informa comunidad tocante TOS. Esaki ta un trastorno den desaroyo di idioma ta algo permanente; bo ta nace cu ne y e ta keda pa bida largo. Rond di 5 pa 7 porciento di mucha cu ta nace tin e condicion aki. For di 2016, FEPOH ta specialisando su mes den e tereno aki. E meta di awe ta pa tur e partidonan presente ta alinea den mesun direccion, pa asina hunto por guia, sostene y fortalece tur persona cu tin un trastorno den desaroyo di idioma na Aruba.
Bunita congreso
E Minister di Salud Publico, Mervin Wyatt-Ras, a remarca e importancia di e colaboracion aki y e necesidad di duna e muchanan un apoyo integral. “Esaki ta un bunita congreso cu FEPOH a organisa hunto cu diferente stakeholder y experto local y di Hulanda. TOS ta crea un barera invisibel. Ora un mucha no ta comprende kico ta wordo papia cu ne of no por expresa su mes—a no ser cu e tin e palabranan den su cabes pero e no por saca nan—e ta sinti su mes insuficiente”, e mandatario a expresa.
E mucha no por sigui e ritmo den klas y hasta tin biaha e no por hunga cu otro mucha den patio. Esaki ta limita su desaroyo y por hiba na otro problema, manera falta di comprension of cu e mucha ta cera su mes. P’esey ta crucial cu e profesional- y maestronan di scol tin e hermentnan pa yuda e mucha desaroya su mes miho.
Comparti conocemento
Ingrid van Gijlswijk, representante di Kentalis na Hulanda, a expresa su entusiasmo pa comparti conocemento cu e profesionalnan na Aruba. “FEPOH a invita mi pa bin haci e trastorno den desaroyo di idioma visibel na Aruba na nomber di Kentalis.”
Nan a organisa un congreso masha bunita. “Mi ta masha contento di por ta aki hunto cu mi coleganan pa comparti nos conocemento cu un publico hopi motiva y entusiasma pa siña.” Na Hulanda tin e bentaha di ta un grupo mas grandi, locual ta facilita e unificacion di conocemento y e investigacion riba metodonan di tratamento cu ta funciona. “Como cu na Aruba esaki ta den su prome pasonan, nos ta masha contento di por trece e conocemento di Hulanda y comparti e via FEPOH”, el a bisa na final.
