E problema di salud mental y adiccion riba caya ta keda un tema candente cu ta preocupa e comunidad di Aruba profundamente. Despues cu polisnan mes a expresa nan preocupacion na Parlamento debi na e falta di experticio pa deal cu casonan di crisis, Minister Mervin Wyatt-Ras a duna un aclaracion amplio riba e situacion actual, e causanan tras di e escasez di facilidad, y e solucionnan cu e gobierno ta desaroyando.
Segun e mandatario, e problematica aki tin mas di dos decada di existencia y no ta atendi adecuadamente den e ultimo añanan. En bes cu a fortalece e red di apoyo pa e personanan cu reto di adiccion o malesa mental, a opta den pasado pa cera facilidadnan di cuido, manera e centro na Cota. Esaki a laga hopi ciudadano sin un luga unda nan por haya e ayudo necesario, obligando hopi di nan pa keda riba caya mientras nan famianan ta sufri e consecuencianan.
Esfuersonan pa habri bek Centro di Cota y Inversion Social
Minister Wyatt-Ras a remarca cu su gobierno, cu tin un aña y mey den gobernacion, a hereda e situacion dificil aki pero ta trahando activamente riba dje. Actualmente, e ministerio ta preparando un proyecto pa bolbe haci uzo di un facilidad na Centro di Cota, unda cu por ubica e personanan aki pa ricibi atencion integral. E esfuerso aki lo ta financia mediante e Fondo di Inversion, cual ta pendiente pa aprobacion den Parlamento.
Mientrastanto, e gobierno a cera un acuerdo cu e centro di rehabilitacion Brasami na Corsou pa asina por manda e clientenan cu mester di cuido intensivo, un proceso cu ta tumando su tempo pa wordo ehecuta completamente.
E limitacionnan legal y e rol di Respaldo
Atendiendo e criticanan dirigi na e fundacion Respaldo, e minister a cataloga hopi di e reaccionnan aki como inhusto. E la splica cu e ley y e proteccion di derechonan humano ta impone limitacionnan estricto riba e forma cu por tene un persona den un centro di cuido.
Hopi di e admision na Respaldo ta ‘vrijwillige plaatsing’ (admision boluntario). Segun ley, si un persona no kier keda den e facilidad mas, e tin e derecho di sali y e institucion no por want’e contra su boluntad. Den casonan mas extremo, ta haci uzo di un Rechterlijk Machtiging (RM), pero esaki ta wordo aplica primordialmente durante un situacion di crisis. Ora e pashent cuminsa mustra mehora, e ley ta stipula cu e por bolbe su cas, impediendo cu e por keda interna pa un temporada largo.
Pa mehora e contesta na momento di crisis, e ministerio ta trahando pa fine-tune e protocol di trabou entre Cuerpo Policial y e Crisis Team di Respaldo, garantisando cu ambos entidad ta actua de acuerdo ora cu un caso di emergencia presenta.
Pa mas lesa TREMPAN.COM.
