Un investigacion riguroso a conduci na dos detencion relaciona cu un robo grandi riba diferente ATM di Aruba Bank. Un local y un Bulgaro ta deteni relaciona cu e caso. Tur cos ta mustra cu e local dimes ta esun cu ta yuda pa e Bulgaro por a move facilmente y asina nan comete e ladronicia grandi aki.
Un team di Recherche a traha intensivamente riba e caso y asina a yega na detencion di e Bulgaro. Nos Fuente ta bisa cu e Bulgaro den e proceso di interogacion a admiti tambe. Asina a yega tambe na e sospechoso local cu tabata yuda. E local parce ta wanta duro ainda. E placa mes no a wordo haya te na e momentonan aki. Ta trata di un suma di 290 Mil Florin. E forma cu nan a horta e placa aki ta dor di bruha henter e sistema di e ATM. Pa ora cu e seguridad di banco a realize ya caba a logra lanta sumanan cuantioso. Tabata lanta diferente ora di dia. Sea den dia of anochi y marduga. Ora cu tabata lanta placa na sumanan di 1000 pa 2000 florin, tabata wanta habri e boca di e ATM ora di saca e placa. Asina e placa ta Sali pero e klep no ta sera automatic pasobra intencionalmente cu forsa e ta keda wanta habri. Esey ta pone cu e sistema di e ATM ta bruha y no ta registra cu e placa a wordo lanta. Asina nan a haci te ora cu a yega na sumanan halto. E tabata trabou di mas cu un siman di tempo pa por a sera e suma di casi 300 mil florin.
A base di e sistema di seguridad cu camara etc a logra haya e cara di un di e sospechosonan. Esey tabata e Bulgaro. Cu hopi inversion di tempo e team di recherche hunto cu Grens Bewaking a keda busca den e sistema di Radex riba un cara cu por ta klop cu e sospechoso. Nan esfuerzo no tabata envano pasobra a logra haya tur informacion di e sospechoso. A focus riba vuelonan di Europa entre otro pa yega na e informacion necesario. Despues di esey a cuminsa busca e paradero di e Bulgaro y a bin logra haci e detencion necesario. Ya for di April e cos a cuminsa move y den tur secrecia a traha riba e caso.
Nos mesa di redaccion tambe a copera cu autoridad riba e caso y asina a mantene tur informacion secreto te awor cu e caso ta practicamente afgerond. Esaki sigur ta un golpi basta fuerte pa Aruba Bank cu kizas ta sigura pa casonan manera esaki. Internacionalmente bo ta haya cierto criminalnan cu ta hit ATMnan. E mesun gruponan aki hopi biaha ta conoci tambe pa hit paisnan cu credit cardnan falso of tambe den casinonan. Awor a bay asina leu di usa nan conocimento pa hit ATMnan tambe usando e sistema cu nos a caba di menciona prome y cu a bruha henter e sistema di e ATM. Mester felicita cuerpo di Recherche y sostend di Grens Bewaking den e caso specifico aki.
