Aruba a bay cu e segundo luga den Panamericano Femenino na Corsou

Desde 2 pa 10 di Juni a tuma luga na Corsou, e di 20th Pan-American Senior International Draughts Championship y e promer edicion di Pan-American Female International Draughts Championship.

Aruba a wordo representa den senior group door di Henri Knepa y Juan Enrique (Ricky) Nisbet. Den categoria femenino Aruba a wordo representa door di Annelaine Jacobs.

Ganado di senior group a bira e Surinameo Guno Burleson. Guno a score 14 punto for di 9 partido. Nos hungador Henri Knepa a sali na di 18 luga cu 9 punto. Ricky a termina na di 32 luga cu 6 punto. Un total di 33 hungador a competi pa e titulo di Campeon Senior Panamericano pa aña 2018.

Parallel cu e senior group, a wordo organisa pa promer biaha den Panamericano di dam un Campeonato femenino. Tawata tin participacion di 8 hungador di 5 diferente pais.
Na prome luga a termina Lublyana Turiy di USA. Lublyana a gana tur su weganan.
E segundo luga a bay pa nos hungador di Aruba Annelaine Jacobs. Annelaine a perde solamente 1 partida contra e ganador di e torneo. Cu e resultado aki, Annelaine a obtene e titulo di Female Master den dam.

9 anja pasa, Annelaine a participa kaba den un Panamerican Youth Draughts na Suriname cu 12 aña y a termina como number 1 den Panamerican Youth.
Awor aki cu 21 aña, e ta termina den e categoria femenino na segundo luga. Un tremendo logro door di Annelaine.

Dirigentenan di club di dam Arowak + familiaresnan tawata na aeropuerto pa ricibi Annelaine.

E number 1 mester representa Las Americas den 2019 na Rusia. Si number 1 pa cualkier motibo no por bay, e ora Annelaine cu a termina na di 2 luga mester representa Las Americas na Rusia. Tin un chens tambe cu nan por scoge 2 hungador femenino pa representa Las Americas na e mundial na Rusia den aña 2019. Annelaine sigur lo bay representa Las Americas e ora.