Ya ta den reunion for di algun siman atras pa loke ta e importacion di klapchi. A reuni cu importadornan y sperando riba e cantidad di container te awor aki. Un cantidad di mas of menos tin registra cu ta supuestamente mester bay yega den e luna di December, segun experto den explosivo, Rubin Ponson di DOW.
E ta sigui splica cu tin varios klapchi warda di aña pasa y loke ta nifica cu eigenlijk segun nan maneho, ta pidi pa e klapchinan yega prome cu December. Tin di compronde cu tin algun problema cu barco, etc. cu probablemente nan lo yega laat. Poco fastioso di esaki ta cu mester mantene nan mes na e reglanan di siguridad, na tur momento di transporta y tambe di habri containernan aki y cu ta bay haci cu mas laat nan yega, menos tempo tin pa por traha cu e containernan aki.
Deadline
Ponson a splica cu deadline, segun maneho di klapchi ta cu e mester yega prome cu December. 30 di November ta e ultimo dia pa e containernan yega.
For di waf pa Wela
Den 24 ora e containernan mester wordo movi for di tereno di waf, bay Wela, y for di eynan, cada importador mester cuminsa busca nan manera di regla nan documentonan pa por habri e container.
Diferencia
Segun Ponson, e aña aki no lo tin mucho cambio riba e reglanan. Probablemente tur cos ta keda mesun cos. Pero si semper ta purba di mantene e reglanan, vooral di siguridad y tambe ora di benta, etc. Semper purba di mantene un tiki skerpi.
Loke ta importante
E trabao mas grandi ta bay bira con ta bay pone e containernan. Ta calcula cu si yega 19 container, kisas cada bendedo na e momento ey lo bay hiba su Container Wela, cual lo bay crea un cantidad grandi di container na e sitio y pa organisa esaki riba e tereno, pa dia di saca nan, e por ta mas facil pa tur e bendedonan.
E trabao di Douane
E intencion ta pa Douane haci su trabao prome cu pasco. Dia 27 cu trabao cuminsa bek, ta dia cu lo saca e containernan aki bek y tin cu wak si por logra pa habri tur e containernan pa e dia ey. Sino lo mester ta despues di pasco ainda, mester bay tin container pa habri, den caso cu nan yega laat. Depende con laat nan yega.
Deseonan di e comision di klapchi
E comision di klapchi tin algun regla ainda cu ta kere cu mester tin ahustacion riba nan. Segun Ponson, den comienso di aña, despues cu e aña cera, lo bay evalua e situacion y lo manda e conseho pa gobierno wak si por avisa e bendedo y e importadornan na tempo di esaki.
Presencia na reunion
E problema hopi biaha cu nan tin cu no ta tur hende ta presenta na nan reunion. E cantidad averahe di bendedonan ta 60 pa 70 y ora cu yama nan pa reunion, kisas ta presenta 10 pa 15 hende, di cual ta haci e situacion fastioso. Ora cu yega y bay cuminsa tuma medida contra di e luganan di benta, nan ta bay bisa cu nan no tabata sa, of cualkier cos asina. Esey ta bira fastioso. Con cu bay bin tin e maneho poni riba papel y ken cu ta por haya esaki pa les’e, pasa door di dje y mira kico ta e reglanan cu tin cu cumpli cun’e.
