Departamento di Asuntonan Economico ta sigui activo den Exprodesk. Sharon Meijer, Policy Advisor di Foreign Economic Relations, a splica cu e ta organisando tayernan pa ekipa nos artistanan Arubano cu e conocemento necesario pa una bes, cu nan ta asina leu, nan por yega na tuma e paso pa exporta.
Pa es motibo aki, e tayer di awe ta tocante contractnan den e industria creativo. Awendia contractnan ta un parti casi inevitabel. Tin diferente tipo di contract, por ehempel contractnan laboral, pero tambe entre e musico mes, cu e compositor of productor. Pa e diferente tipo di contractnan aki cu ta wordo cera, e artista no sa tur ora e detayenan of tin e wowo clinico pa mira kico pa busca den e contracto prome cu e firma esaki.
Door di esaki, Exprodesk a haya cu ta un bon oportunidad pa invita AMAA, pa asina duna un tayer interactivo, unda cu contractnan di casonan real a wordo parti y unda por a practica durante di e tayer, pa mira kico por mehora of kico ta eroneo den e contracto. Participantenan a haya toolsnan practico cu nan por bay cas cun’e, pa por sigui studia riba dje.
Satisfaccion
Segun Meijer, e reaccion di e participantenan ta hopi positivo. Exprodesk ta duna diferente tipo di charla, diferente tipo di tayer y training. Den e tayer spesifico aki,bo tin sra. Nicole Booi, cu ta e abogado inhouse di AMAA, cu a presenta e parti di contract. Exprodesk ta sigui mañan, 19 y 20 di april cu e tayer, cu ta yama “Raise your Digital IQ”. Esaki ta wordo presenta pa Defiant Concepts cu ta un compania cu hopi experiencia amplio y cu a duna diferente workshopnan caba den e ambito aki cu ta trata social media y online marketing strategies. Pa por exporta, e artista mester tin un presencia online y sa con pa uza social media efectivamente, con pa crea mas trafico y con hendenan por engage cu e contenido cu e a post. Tin hopi hende ta pensa cu social media ta simplemente un Facebook, y un website. Pero e ta hopi mas cu esaki, door cu mester sa kico ta un bon website y kico ta un bon portfolio riba social media. Dia 24 di april lo bay tin e tayer Taxation den Creative Industry. Esaki lo wordo presenta pa PWC Aruba. E ta un tayer cu hopi informacion valioso cu ta specificamente traha y adapta, pa e industria creativo.
Tema
Tin espacio pa mas encuentro, segun Meijer. Exprodesk ta busca kico ta e bottlenecksnan cu nos Artistanan ta confronta nan mes cun’e y a base di esaki ta busca presentadornan specialisa pa cada sector spesifico. Den e caso aki cu ta industria creativo, AMAA ta e asociacion na Aruba di Musico y Artista Arubiano cu un abogado cu amplio conocemento riba e tema aki y cu experencia cu e tipo di contractonana aki, segun Meijer.
