Minister Plenipotenciario, Guillfred Besaril a duna su reaccion riba veredicto di Desiree de Sousa-Croes, mirando cu e posicion como director di Arubahuis supuestamente ta man drechi di un minister, den e caso aki minister Plenipotenciario.
El a comenta cu a tuma nota di e sentencia y a laga e asesornan huridico repasa e vonnis prome cu a bin dilanti. Minister Besaril a splica cu den e sentencia ta mira cu nan ta bisa gobierno cu e decision cu a tuma di pon’e na DPS no ta corecto. E ta stop e decision eynan di gobierno y e ta bis’e den e mesun sentencia ey, cu e ta keda cobra e salario di director, den e caso aki. Pero e no ta dun’e e derecho y e ta mencion’e tambe den e vonnis di pasa ocupa e funcion di director di Arubahuis.
Si e kier ocupa e posicion di director di Arubahuis, e ora ey e lo mester cuminsa cu un otro caso. E caso eynan di berdad, no lo bay ta fructifero pa su persona, pasobra dado momento, ora bo ta un director, e ora ey, vooral ora bo ta un director di un Arubahuis, bo ta un persona di confiansa pa loke ta e minister plenipotenciario, bo ta su man drechi, bo ta un persona cu boso dos mester come y lanta hunto y nan dos tin cu cana man den man cu otro. En bista di tur e cosnan cu a sosode cu e señora aki en cuestion, den su tempo, hamas y nunca e por ta e persona cu por ta man drechi di e minister plenipotenciario. E persona cu bo ta cumbaya cun’e. Hamas y nunca e lo por sosode entre e y e minister. Tanten cu Besaril ta minister, e persona aki no ta bon bini na cas di Aruba. E no ta bon bini tampoco pa pasa ocupa e oficina di director di Kabinete van de Gevolmachtige minister. Como persona inteligente e ta compronde esaki tambe. Na final, segun e minister, e caso aki tabata netamente pa el a mantene un entrada y mañan ta pueblo ta dicidi si e ta continua na ricibi e entrada aki of cu nan ta sinti cu e entrada aki ta inhusto.
Ainda, pa e parti huridico, no ta cla ainda, pasobra sigur sigur, ta di cuestiona cu ta dun’e e privilegio di keda mantene e salario ey, a base di un landsbesluit, a base di algo cu nunca antes historicamente a sosode. Den nos historia, semper tabata asina cu e directornan di kabinet desde 1986 cu nos a bira pais, ta bin y bay cu e Gevminnan. Esaki ta un situacion particular. E landsbesluit aki ta di cuestiona. Tanten e vonnis aki ta sigui cobra su salario, pero esey no ta nifica cu tur e parti huridico lo nifica. Prome minister e ora ey lo sigui deal cu e asunto aki di e señora en cuestion.
