Pa loke ta e parti di permiso, ta loke tabata discuti riba dje den e reunion di comision di vuurwerk. Segun vocero di cuerpo di bombero, Ferdinand Ponson, a splica cu tin persona cu ta pidi tres of cuater permiso riba e mesun nomber. Esaki a purba di evita pa ora cu bay haci control, e vergunninghouder, ta na e punto di benta y pa evita cosnan manera cu a pasa a e aña aki.
E aña aki, riba e prome dia a haya hopi vuurwerk bieu den container. Pero door cu e persona ta doño di e mesun vergunning di un otro luga, tur dos luga a wordo cera. Esaki ta cosnan cu kier evita pa por sigui opera normal den e otro puntonan di benta. Door cu nan ta riba e mesun vergunning, reglanan ta bisa cu tur dos mester a wordo hala aden di biaha.
Mas negoshi riba un solo nomber
Tabata tin un aña y mey ta splica for di prome cu e temporada di 2016, con e ta bay. Durante e ultimo reunion den 2017, a splica nan tambe y bisa nan con e cos ta bay. Toch nan a haci esaki. Den seno di nan mes, nan a bin acepta cu tabata tin un operador cu tabata bezig ta handle cu esaki. No por bisa cu el a haci’e pa su fout, pero pa negligencia sigur el a manda tur e vergunningnan manera cu e ta custuma di manda y no a haci cambio. Esey a haci cu e puntonan di benta a haya problema cu e vergunningnan.
Kico lo bay pasa
A sinta den diferente reunion prome cu e comision. Pa fin di luna di Januari lo bolbe sinta pa cada dienst entrega su rapport, haci uno solo y entrega esaki na minister di Husticia. E bon comunicacion cu tin cu e minister di husticia, cu lo bay traha un werkgroep, pa asina por wak e beleid, drecha poco cos den dje, mehora pa siguridad, cosnan cu ta mira cu tin cu pone mas atencion riba dje, lo bay wordo haci. Tin e backup di e minister di husticia pa haci esaki e aña aki.
Kico ta mas importante
Segun Ponson, hopi biaha nan ta pidi pa manda un carta pa cada un di nan, pero hopi biaha ora haci esey, nan ta bisa cu nan no a wak nan mail, of no a ricibi post. E ora a dicidi pa haci esaki via telefon. Cada importador ta wordo yama individual y cada bendedo ta wordo yama individual pa bin na e reunionnan. E asistencia di e bendedonan ta hopi abao, e importadornan si ta bin. Por ehempel e bendedornan ta manda un persona pa cada 7 of 8. E persona aki ta hiba e mensahe bek. Tambe tin cu paga tino cu den e reunion mes nan no ta pone 100% atencion na loke ta papia. Esaki ta e cosnan cu nan ta skip y ora di e temporada, nan ta haya problema cu ora mester bay y tin cu cera e luga pa nan drecha y pa nan por sigui opera despues.
Cuanto importador y bendedo tin
Tin 83 punto di benta cu a pidi pa vergunning. Tabata tin un total di 9 importador. For di eynan ta saca 83 punto di benta. For di e importadornan ta saca e puntonan di benta cu ta 83 punto di benta. Nan ta busca nan containernan cu nan tabata tin for di 2016 y 15 container cu a yega di 2017 pa wordo bendi pa e temporada.
Control di klapchi
Manera cu e vuurwerk bay sali for di Wela, e ta wordo controla. Tin un team cu ta controla caha pa caha, coba den tur di nan. Si tabata tin containernan cu a saca nan vuurwerk y ora cu bay wak, e container ta asina yen, cu a coba den e cahanan y no a haya nada. Pero despues a bin ripara ora di control, cu si nan por a bin cu e vuurwerk di otro caminda y hink’e den e container eynan. Manera cu bin haya nan cu e vuurwerk bieu. Nan por ta scondiendo vuurwerk bieu otro caminda, pero ora cu e sali for di Wela e ta wordo controla. E aña aki tambe, ora cu e vuurwerk yega Wela na Januari, el a wordo controla pa sa ki vuurwerk tin pa asina e no wordo altera den e aña venidero.
Con sigur nos ta
Tin di compronde na Europa y Hulanda, ta un potret bo ta wak y bo ta pidi tal number y bo ta haya bo klapchinan un otro caminda. Hopi reglamenta y hopi siguridad. Segun Ponson, na Merca nan ta bendenan na establecimentonan. E edificionan ta wordo traha specialmente pa esaki. Nan tin tur sistema di combatimento di candela den e luga. Na Aruba, temponan aya tabata bao di un palo, bao di un tent, tabata den negoshi, den supermercado mes nan tabata haci’e. Esaki ta biniendo di 2001/2002, el a keda bin. Na 2011, e maneho a bin den funcion cu ya nan a drecha loke ta e parti di tent. A pone container y ta bayendo hopi bon, cu ta caminda e ta. Awor aki e ta hopi sigur. Si tin cu tene cuenta cun’e, cu e publico mes tin biaha nan no ta tene cuenta cu nan ta mucho cerca di un punto di benta y eybanda mes nan ta tira vuurwerk. Nan tin cu concientisa riba esaki, cu ta peligroso pa tira cerca di un punto di benta, pasobra si algo bay fout, hendenan cerca no ta bay tin chens di core pa nan siguridad.
