For di diahuebs 10 di october te cu diadomingo 13 a tuma luga e Aruba Chess Challenge den e Conference Room di La Cabana Beach Resort.
Hubert Randolph Tromp, presidente di e Federacion di Ahedres di Aruba, a comenta cu tabatin varios wega di ahedres durante tur e dianan aki, cual tabata hopi combativo.
No solamente tabata tin pa adulto, pero muchanan tambe por a competi den e torneo aki.
Normalmente den e Open tin 7 buelta y a dura te cu diadomingo. Den U18 tambe tabata tin 7 buelta. Pa e muchanan si nan a tene mas cortico, mirando cu nan por cansa. Nan ta hunga weganan di menos duracion, hungando 25 minuut pa banda. Den e U18 y e Open ta un ora y mey cu intermedio di 30 seconde cada biaha.
Popular
Loke cu ta mirando den e ultimo dos añanan cu poco poco e ta birando mas popular. Por ta cu pa e motibo cu ta presentando e wega na comunidad. E weganan riba nan mes ta mescos cu deporte. Mester prepara, fisicamente e persona mester ta bon y mester ta descansa. Hopi hende ta kere cu ta sinta henter ora y no ta haci nada. Ta lubida tur e procesonan fisiologico cu un hungado ta pasa aden. Si mira un wega cu ta bay gana, e hungado su curason ta acelera y ora bay perde, ta mesun cos. Na olimpiada, tin hende cu a fayece tras di borchi di ahedres door di un atake di curason. Pues mester ta fisicamente na ordo. Eynan bo ta haya un idea di con intensivo e wega ta.
Un otro ehempel ta e campeonato mundial cu tabata tin recientemente. Un di e retadornan a bisa tambe, cu el a perde algun kilo, despues di e competencia, sinta tras di un borchi.
Gradicimento
Tromp kier a gradici tur e sponsornan. Sin nan, e torneo aki no lo tabata posibel. Tambe ta pone pueblo na altura, cu nan tin nan federacion FIDE. Tambe un miembro di directiva cu ta den e board di FIDE pa e parti di hungadonan femenino. Ta bay uza e trampolin aki pa bay mas leu, mirando cu nan tin ambicion como federacion.
E torneonan aki ta conta pa internacional. E puntuahe ta manda pa FIDE y tin arbitronan internacional.
Interes
Casi tur dia tin hende na Nieuwstraat 11, cual ta na cabamento di Caya Grandi. Tabata e consultorio bieu di dr. Heinze. Eynan ta caminda cu nan ta hunga. Si bo ta interesa pa bin wak con ta hunga ahedres y si bo gusta, bo por keda y bira miembro.
