Servicio di prizon di Rusia a informa cu nan ta investigando e “morto repentino” di Navalny. E comunicado cu nan a emiti ta bisa cu Navalny a cuminsa sinti malo despues di un caminata diabierna y “casi mesora el a cay flauw”.
“Personal medico di e prizon a yega mesora y a yama ambulance. A tuma tur e medidanan di reanimacion necesario, pero e no a duna resultado positivo,” e comunicado ta bisa. Y a agrega cu tabata e dokternan di emergencia cu a yega a confirma morto di e prizonero.
Na augustus ultimo Navalny a haya un condena di prizon di 19 aña despues cu a declar’e culpabel di crea un comunidad extremista, financia actividadnan extremista y diferente otro delito.
Na e momentonan ey ya caba e tabata sintando un castigo di 11 aña y mey den un centro di maximo siguridad pa fraude y otro cargonan cu semper el a nenga.
Navalny a bira hopi malo na augustus, 2020, mientras cu e tabata biaha bek pa Moscu for di e ciudad siberiano di Tomsk. E piloto a realisa un aterisahe di emergencia na Omnsk, for di unda a traslada Navalny pa un hospital pa ricibi tratamento urgente prome cu a translade pa Alemania, den estado critico.
Gobierno a bisa e tempo ey cu a venena Navalny cu un agente kimico di Novichok. E ta un material inusual, y masha poco cientifico pafo di Rusia tin experiencia real como trata esaki.
Un investigacion cu a sigui a saca afo cu un ekipo elite di servicio di siguridad FSB di Rusia, a sigui Navalny durante mas di tres aña. Un di e agentenan ey a revela cu den un operacion cu e material nervioso Novichok a wordo hinca den e jockey di e activista.
