Manera ta conoci, Gobierno a introduci medidanan general di control pa combati COVID-19 bou di e ordo Ministerial AB 1989 no.62. A bin cu e toque de queda, shelter in place, a cera e frontera, tur esaki tabata pa evita cu e virus ta plama. Na momento cu reduci e medidanan aki ta hopi escencial pa tur dunado di trabou keda practica e medidanan di prevencion manera e distanciamento social y esun di higiena. E rekisitonan aki ta lo minimo cu e dunado di trabou mester cumpli cu ne pa por habri su establecimento, si no cumpli cu esaki Departamento di Salud Publico lo cera e establecimento, asina Minister Dangui Oduber a trece dilanti.
E Minister a menciona cu Aruba ta sigui e reglanan di prevencion estableci door di WHO. Segun e profesionalnan, e COVID-19 no ta bay di awe pa mañan y pesey ta importante pa introduci tres medida cu dunadonan di trabou mester tene cuenta cu ne:
1) Medidanan pa garantisa e distancia social
Cada organisacion / empresa / institucion / dunado di trabou mester tuma e medidanan necesario pa tin e distanciamento social di minimo 1.5 meter entre e trahadornan y e cliente. Esaki ta pa garantisa e seguridad y salud di tanto e empleado y di e cliente. Tambe ta recomendabel pa e empleadonan traha for di cas y/of introduci horarionan di trabou mas flexibel, tur esaki si tin posibilidad.
2) Medidanan pa garantisa un bon higiena
Cada organisacion / empresa / institucion / dunado di trabou mester tuma e medidanan necesario pa facilita y promove un bon higiena na nan establicimento. Esaki ta pa garantisa e siguridad y salud di tanto e empleado y di e cliente.
3) Medidanan pa nenga entrada na empleadonan y clientenan malo na un establicimento
Cada organisacion / empresa / institucion / dunado di trabou mester tuma e medidanan necesario pa garantisa cu no tin empleadonan of cliente cu tin problema di respiracion (tos, falta di sentido di holo, dolor di garganta) na e establicimento. Esaki ta pa garantisa e seguridad y salud di tanto e empleado y di e cliente.
Minister Dangui Oduber a splica cu tur e medidanan aki ta pa e propio siguridad di pueblo y ta bay tin control di parti di Gobierno pa sigura cu sector priva ta cumpli debidamente cu esakinan.
