Pristine Estates N.V. (“Pristine”) ta doño di e edificio den cual Holiday Inn Resort ta opera. Relaciona cu ceramento di Excelsior Casino, a enfatisa cu esaki no tin nada di haber ni cu doño di e edificio ni tampoco cu Coronavirus. Ta un debe bieu cu e compania tin cu pago atras di huur cu e no por cumpli cu ne, pa cual a dicidi cu no ta renoba e contract existente cu a termina dia 30 di april 2020. E trahadonan tur ta den servicio di e casino mes y no di doño di e edificio.
Ora cu e Corona-crisis a cuminsa na maart 2020 y e casinonan na Aruba mester a cera nan porta, Pristine Estates NV a bay di acuerdo pa no cobra huur temporalmente. Sinembargo y lastimamente no tabata posibel pa extende e contract di huur despues di April 2020 pasobra Excelsior Casino no por a cumpli cu su otro obligacionnan. E otro obligacionnan aki tabata entre otro esun di paga casino gaming tax y gastonan di casino controleurs.
Durante e ultimo 4 añanan, Pristine Estates y su doño, Alfredo Lowenstein, hunto cu Gobierno di Aruba, ta trahando riba plannan pa
renobacion y desaroyo di un proyecto hotelero di calidad halto riba e parcela di Holiday Inn. E plannan aki ta inclui un inversion substancial di Pristine Estates y crea mas cupo di trabou y otro beneficionan importante pa economia di Aruba. E beneficionan aki ta inclui entre otro centenares di cupo di trabou den sector di construccion.
Na e momento aki Pristine Estates ta en espera di cierto aprobacion necesario di Minister Marisol Lopez di Infrastructura y di Minister Dangui Oduber di Turismo, pa e proyecto. Asina cu ricibi esaki lo sigui inmediatamente cu e renobacion y ampliacion di e proyecto hotelero.
