Aruba ta biba den un era moderno y esey ta e caminda cu Departamento di Impuesto ta scoge pa cana tambe. mr. Luenne Gomez Pieters, directora di DIMP, a splica un poco di tur e cambionan cu ta na caminda.
Den e situacion actual DIMP a ricibi 16 mil cliente na caha y 4500 na e sala di entrada di personanan cu ta busca informacion. Pues en total 20 mil cliente cu nan a atende for di luna di januari pa april.
Ta bay digitalisa hopi servicio di DIMP
Ta bay digitalisa hopi servicio di DIMP. Click link pa mas https://24ora.tv/2XVNDbd
Posted by 24ora on Tuesday, June 18, 2019
E cifranan aki ta indica, segun Luenne Gomez Pieters (Directora di DIMP) cu clientenan no ta custumbra ainda cu pagonan online. Sinembargo e ta conseha pa haci uzo di esaki, pasobra recientemente banconan a introduci un sistema special di “bill payment” den cual ta permiti pa pone mas dato. E sistema aki ta hopi mas eficiente cu transfer, ora cu ta haci pagonan di p.e. Loonbelasting, BBO, etc. Un otro servicio cu ta bay mehora ta e automatisacion di “aangifte formulieren”. Esaki ta bira un realidad pa final of cuminsamento di aña. E ta haci henter e procedura uno mas eficiente, enbes di haya 16 mil cliente sinta na oficina di DIMP sperando nan turno pa haci nan pagonan. “Tecnologianan ta apoya e procesonan y nos mester haci uzo di nan mas hopi posibel. Ademas, e ta un servicio un tiki mas priva cu esun na caha,” Gomez Pieters a bisa.
DIMP mes ta haci pago di restitutie via di banco. A constata si cu hopi di e pagonan aki ta wordo debolbi. E motibo ta cu un cliente a cambia di banco, y no a adapta su informacion, of tin cliente no tin cuenta registra y no ta haya nan pago. Ta conseha tur hende pa adapta nan datonan na DIMP p’asina e transferencia di Banco Central, pa loke ta Restitutie, pa e cliente bay sin problema. Na mesun momento e Directora ta recorda cu ta trahando pa digitalisa tur nan procesonan, y nan ta depende hopi di e informacion cu e cliente a duna nan y cu ta anota den e documentonan. Otro aspecto cu ta trahando riba dje ta mehoracion e “ticket system”. Na momento cu un cliente scoge un ticket na DIMP of na oficina di MFA ta aparece di biaha e tempo di espera. E cliente e ora por dicidi si e ta sinta warda, of ta haci e pago online. Na final ta bay keda cu un solo loket cu ta tuma pago efectivo, cu mayoria biaha ta wordo uza door di pensioenadonan cu ta haci uzo di e bishita aki como un sistema pa sali di cas y relaha nan mes. Prome cu tur e sistemanan di digitalisacion bay “on”, cliente ta wordo invita pa test esaki.
